Shillong, Jylliew 02
U Amit Panghal bad ka Jaismine Lamboria ki la ïoh rung sha ka Paris Olympic ha ka jingïaleh-kai ïakura.
U Amit uba la khur ka takma rupa ha ka World Championships u la ïoh rung sha ka Paris Olympic hadien ba u la pynliem ïa u Chuang Liu ka China ha ka 51kg quarter-final ka 2nd World Qualification ha Bangkok.
U Panghal, uba dei tang ma u na India uba la khur takma rupa ha ka World Championship, u la ïakhun tyngeh bad jop da 5-0 pyrshah ïa u Liu ban ïoh ka tiket sha ka lympung Olympic Games ha ka sien ba-ar.
U Amit mynta u sa ïadon bynta bad kiwei pat ki ‘rang bad ‘thei ïakura ban mihkhmat ïa ka Ri ha ka Paris Olympic ba kynthup ïa u Nishant Dev (71kg), ka Nikhat Zareen (50kg), Preeti Pawar (54kg) bad ka Lovlina Borgohain (75kg) bad ka Jaismine.
U Panghal u la lah ban pynurlong ïa kane ka kabu kaba khatduh ban ïoh rung sha ka Paris Olympics hadien ba u la shah rem noh ha u Deepak Bhoria ha ka ‘Selection Assessment’.
Katba ka Jaismine Lamboria kaba dei ka National Champion ka la ïoh rung sha ka Paris Olympics hadien ba ka la ïoh jop ha ka 2nd World Qualifica-tion Tournament ha ka Sngi U Blei.
Ka Jaismine, kaba la hiar na ka kyrdan 60kg, ka la ïoh ban ïakhun pat ha ka women’s 57kg na ka bynta ka ri. Ka jingïoh rung sha Paris Olympic ka la wan urlong hadien ba ka lah ban pynliem noh ïa ka Marine Camara na Mali ha ka quarter-final.
