Shillong, Jylliew 02
Ka Real Madrid kaba dei kawei na ki club ba radbah ha Spain ka la ïoh ban rah ïa ka nam lahduh kaba 15 jong ka UEFA Champions League. Kane ka la wan urlong hadien ba ka la lah ban pynliem noh ïa ka Borussia Dortmund na Germany ha ka final kaba la long ha Wembley Stadium ha London, England.
Ha kane ka jingïalehkai, ka Real ka la pynliem da 2-0 kol ïa ka Dortmund. ïa kine ki kol la ïoh ban thep da u Dani Carvajal bad Vinicius Junior. Wat la ka Dortmund ka la lah ban ïalehkai bha ha ka kylla step hynrei kam shym la lah ban pynkhih jar hadien ba ïoh katto katne ki kabu ksiar.
Hynrei haba bteng ïa ka kylla miet, wat la ka Real Madrid kam shym la don ha kata ka rukom ïalehkai kumba ka ju pynpaw, ka la lah pat ban khyrwit ar tylli ki kol bad pynkut syndon ïa ka jingangnud ka Dortmund ban jop ïa kane ka nam lahduh kaba heh ha dewbah Europe.
Ka Dortmund haba mih madan, ka la thrang ban rah jingjop ha kane ka madan, kaba ka la shah rem ha ka final jong u snem 2012 ha Bayern Munich.
Kane ka sngi kan dei ruh ka sngi ba kyrpang tam ïa u Toni Kroos, uba la mih noh na ka Real Madrid ryngkat bad ka takma Champions League, katba kam shym la long pat kaba biang tam na ka bynta u Marco Reus uba la pynbna ban mih noh na ka Dortmund ka club kaba u la don naduh dang khynnah, ha kaba kut jong kane ka aiom.
Kumjuh ruh na ka liang u Carlo Ancelotti u la lah ban nang thaw khana pateng shuh da kaba jop ïa ka nam lahduh kaba san kum u Coach ha kane ka lympung, kaba la pynlong ruh ïa ka Real Madrid ban rah haduh 15 sien ïa kane ka nam lahduh.
Kane ka aiom kan dei ruh kaba biang tam na ka bynta u Jude Bellingham ka Real Madrid, namar ha ka aiom kaba nyngkong u la don bynta ban jop bad rah ïa ka La Liga ha Spain bad ka Champions League Trophy. Ha kawei ka liang, kane ka aiom kan dei kaba sngewsih ïa u Jadon Sancho uba la ju ïalehkai lang bad u Bellingham, uba don mynta bad ka Dortmund.
