Sanaa, Jylliew:
Katkum ki khubor la ong ba ka US bad ka Britain ka la thombor sha katto katne ki bynta jong ka Yemen naduh ka miet Sngi Palei haduh ka kylla step Sngi Thohdieng khamtam ha ka nongbah Sanaa bad ki bynta sangeh jhad jong katei ka nongbah.
Ki lad pathai khubor ki iathuh ba ha katei ka miet baroh shi miet ki la ïohsngew ia ka jingriew bad jingsawa bad jingbthei ki bom ba la ther da ki shipai ka US bad Britain sha katei ka thaiñ Sanaa bad sha ki bynta sangeh jhad jong ka nongbah Hodeida.
Namar la ong ba ka Huthi kaba synshar ia ka Al-Masirah ruh ka la iathuh ba kitei ki bom jong ka US bad Britain ki la leit hap bad bthei sha ki thaiñ da don ki shlem treikam ka Yemen hapoh ka shnong Taez.
Ha katei ka jingjia la ong ba katto katne ngut ki la khlad bad don ruh kiba la mynsaw ha kajuh ka por.
Watla katta, la ong ba ym pat lah ban kdew ne pynshai thik-thik ba mano ba don kti ha katei ka kam thombor hynrei la ong ba ki shipai ka Britain bad ki jong ka US ki la iatrei lang ban leit ther bom sha ki katto katne ki bynta jong ka Yemen namar ka jing pyni bor jong kitei ki lehnoh Houthi ia ki jhad kiba iaid lyngba ia ka duriaw Red Sea bad ka Gulf of Aden.
La ong ba naduh u Kyllalyngkot jong une u snem 2024 hi, ka United States bad ka Britain ki al pynphai kylliang ia ka jingleh pyni bor jong kitei ki lehnoh Houthi da kaba leit ther bom sha ki bynta ba shajan ka duriaw jong ka Yemen, kum shi bynta ban long ka jingmaham pyrshah ia katei ka kynhun lehnoh ba kam dei ban pynthud ia ki kam jong kiwei pat ki ri da kaba ther bom sha ki jhad kiba iaid lyngba ia katei ka bynta jong ka duriaw kaba hap hapoh ka jingkhmih jong ka Yemen.
Kumta, la ong ba katei ka jingleit thombor bad ka jingleit kput jong ka US bad ka Britain ha kane ka kynti, ka la pynduh nong ruh ia ka Huthis kaba la maham bad thmu ban thombor ia kat ki jhad jong ka US bad ka Britain kiba leit ban iaid lyngba lane kiba leit poi sha kitei ki bynta jong ka duriaw da ka jingthmu ban leit poi sha Israel.
