Shillong, Jylliew 02
Ka kynroh jong ka PA Sangma Sports Complex kaba don marjan bad ka Sewage Treatment Plant bad Indoor Hall 2, kaba dang shu dep tei dang shen, ka la khyllem noh ha ka step jong ka Sngi U Blei.
Lah ban pynkynmaw ba kane kam dei ka sien ba nyngkong hynrei ka kynroh jong kane ka Sports Complex kaba la pyntrei da ka kompeni Hindustan Steelworks Construction Ltd (HSCL) ka la dep ban khyllem ruh teng.
Ha kaba ïadei bad kane ka jingkhyllem ka kynroh, ka Director ka tnat Sports & Youth Affairs ka jylla ka Kong Isawanda Laloo ha ka kyrwoh khubor ka la pyntip ba kane ka jingkhyllem ka khlem ktah pat ïa ki jingtei kiba kongsan jong ka Stadium.
Ka Kong Laloo ha ka kyrwoh ka la pyntip ba la dep ban bthah ruh ïa ka kompeni Hindustan Steelworks Construction Ltd (HSCL) kaba pyntrei ïa ki jingtei jong kane ka Sports Complex, ba kan aiti ïa ka kaiphod kaba bniah halor kane ka jingjia.
Ka kyrwoh ka la ong ruh ba namar ka jingther u slap ka la wanrah ïa ka jinglang um bad pynshlei ïa ka nala kaba la buh. Kane ka nala ka dei kaba la buh ban pyntuid ïa ka um, ki jakhlia na ka STP Tank, Indoor Hall 1, Indoor Hall 2 bad ka Complex. Hynrei, namar ka jingtrei ïa kine ki jingtei ki dang ïaid shakhmat, ym pat shym la lah ban shna pyndep lut pura ïa kane ka nala bad kane kala pynlong ïa ka jinglang ka um na u slap bad wanrah pat ïa ka jingkhyllem kane ka kynroh.
Ka Kong Isawanda Laloo ka la pyntip ruh ba kane ka kynroh kaba khyllem ka dei kaba shu shna shipor ban phiah pud bad khang lad ïa ka jingkyntur jaka, ka la ong ba kiwei ki jingtei ha kane ka jaka ki dang ïaid shakhmat bad ïa ki jingtip ba kham bniah yn sa ai hadien ba ka ophis ka la ïoh ïa ka kaiphod na ka kompeni ba pyntrei ïa ka projek.
Ha kajuh ka por, ka Kong Isawanda ka pyntip ba ki bor District ka West Garo Hills ki la shim mardor ïa ki lad ki lynti ban pynthikna ïa ka jingshngaiñ ki nongshong shnong ka thaiñ.
Kawei ka longïing kaba la shah ktah na ka jingkhyllem jong kane kynroh la pynkynriah bad ai ïa ki lad jingïarap ba kynthup ïa ki jaka sah, ki marbam bad baroh ki jingdonkam, ka la ong.
Hynrei ka jingkylli kaba mih ka long, hato kane ka jingtei wat la pynshai ba ka dei ka jingtei shipor, hato ka jingkhyllem ka dei na ka jingtrei torti ne na kiwei pat ki daw kumba la pynshai?.
