Geneva, Jylliew:
Ka United Nations ha ka Sngi Thohdieng ka la pyntip ba ki jingiarap ba la phah da katei ka tnat naduh ki mar-bam haduh ki dawai-dashin kiba la pynpoi sha Gaza na ka bynta ki paidbah nongshong ka Gaza kim shym poi pat sha ki paidbah kiba donkam ia kitei ki jingiarap.
Namarkata, u Lamphang ka tnat OCHA jong ka UN, u la ong ba ka jingeh kaba khraw ha kane ka por ka long ba kitei ki jingiarap ba ka tnat ka la phah bad mang kyrpang, kim shym poi sha kitei ki paidbah kiba donkam shisha ia ki.
Ha kajuh ka por ruh u la pynpaw ia ka jingsngewkhia jong ka UN halor ka jingkhang noh jong ka Israel ia u khappud ka Israel bad Gaza na Kerem Shalom, kaba long ka bynta ba kongsan tam ban lah ban pynpoi da kaba suk ia kitei ki lad jingiarap sha ki paidbah ka Gaza Strip.
Kumta u la ong ba ka UN ka ngeit skhem ba ki jingiarap ba ka tnat ka phah kin ym sahkut tang ha khappud jong ka Israel hynrei kin poi sha ki paidbah nong Palestine kiba shong ha Gaza bad kiba donkam shisha ia ka jingiarap ha kum kane ka por ba ka thma hapdeng ka Israel bad ka Hamas ka la neh kumba hynriew bnai lynter.
Ka thma hapdeng ka Israel bad ka Hamas ka la sdang ha ka 7 tarik u Risaw ha kaba ki lehnoh Hamas ki la leit ban thombor sha ki bynta Shathie jong ka Israel bad kaba la shim ia ka jingim jong palat shi-hajar ngut ki nong Israel ha katei ka por.
