Srinagar, Jylliew:
Wat lada ki shipai ki la pynrem jur halor kawei ka jingjia, ki la don kumba 16 ngut pat ki shipai, kynthup ïa 3 ngut ki Lieutenant Colonel, kiba la shah ujor ejahar halor ka jingthombor pyrshah ïa ki pulit ha ka jaka treikam jong ki pulit kaba don ha Kupwara distrik jong ka Jammu & Kashmir bad rahbor ïa u pulit.
Ha kaba ïadei bad ka jingjia ba la pynshisha halor ka jingthombor jong ki shipai kaba la jia ha ka janmiet jong ka sngi Ba-ar, ki la don san ngut ki pulit, kynthup u Station House Officer (SHO), kiba la mynsaw. Ki pulit ki la buh da ka jingujor ejahar kaba don ïa u No. 121/2024 bad pynngat hapoh ki kyndon 186, 332, 307, 342 147, 149, 392, 397 bad 365 jong ka Indian Penal Code, bad ka No. 7/25 kaba la pynngat hapoh ka kyndon Arms Act pyrshah ïa kine ki shipai jong ka kynhun 160 Territorial Army Unit.
Ka jingujor ejahar ka la don ïa ki kyrteng jong ki 16 ngut ki shipai, kynthup ïa lai ngut kiba don ha ka kyrdan Lieutenant Colonel, kiba kynthup ïa u Lt Col Ankit Sood, Lt Col Rajiv Chauhan bad Lt Col Nikhil. Katkum ka jingujor ejahar la kynnoh ba kine ki 16 ngut ki shipai ki la rung ha ka jaka treikam jong ki pulit ha Kupwara khlem da ïoh jingbit ha ka por 9.40 jong ka miet sngi Ba-ar jong ka taïew ba la lah.
“Haba la kylli jingkylli shaphang ka jingtur jong ki sha ka jaka treikam jong ki pulit, kine ki la pynibor bad thombor pyrshah ha kaba ki la leh beaiñ, kumba la sakhi, la ong kiba bun na ki nongtrei bad ki pulit kiba don ha katei ka por ki la shah thombor da kaba shah tied da ki tdong suloi, shah kynjat bad shah sangoh,” la ong ka kyrwoh khubor.
Shuh shuh la ïathuh ba haba ki heh pulit ki la poi ha katei ka jaka treikam ban pyllait im ïa ki pulit, ki shipai ki la knieh ïa ki tiar siat bad knieh ruh ïa ki Mobile Phone jong ki pulit kiba la shah pynmynsaw bad jong u SHO. “Haba ki la mih na ka jaka treikam jong ki pulit, ki la rahbor sa ïa uwei u pulit ïa uba la tip kyrteng kum u Ghulam Rasool,” la ïathuh shuh shuh ka kyrwoh khubor. Ïa ka jingtohkit halor ka jingjia la pynlong da u Deputy Superintendent of Police.
