Shillong, Jylliew 02
Ka Shillong Sports Association (SSA) ha ka sngi Saitjaiñ ka la ïoh ban jied ïa ki nongkitkam kiba thymmai bad ki dkhot ka council ha ka jingïalang kaba la long ha Polo.
U Bah Banteidor Lyngdoh (ba ju khot ieid Bah Pai) uba dei ruh u Nongaibuit jong ka Sorkar Meghalaya bad ruh u MLA ka Mawkynrew Constituency u la shah jied kum u President bathymmai jong ka SSA.
U Bah Banteidor u dei uwei na ki nongïalam uba la don ka jingshemphang kaba la slem bha ha ki kam ïalehkai naduh ka por ba u dang don bad ka Langsning Football Club, ha ka SSA bad ruh uba la bat teng ruh kum u Myntri ka tnat Sports and Youth Affairs.
Ka jingshah jied jong u Bah Banteidor kum u nongïalam bathymmai ka SSA, la khmih lynti ba kan sa lah ban wanrah jingkylla khamtam ban kyntiew shuh shuh ïa ki kam ïalehkai.
La ju sakhi ba u Bah Pai u dei uwei na ki nongïalam uba ju sngewtynnad bha ïa ki kam ïalehkai bad tang hapoh ka Constituency lade ruh u la lah ban pynlong shibun ki lympung ïalehkai ban kyntiew ïa ki khun samla shnong.
U Bah Robert Dkhar u la shah jied kum u Working President bad la jied ruh haduh 5 ngut ki Vice President jong ka SSA bad kine ki long u Bah Synshar Rapthap, Cliff R Nongrum, Theory Marboh, Bantylli Narry bad Daniel Thangkhiew.
U General Secretary bathymmai jong kane synjuk u dei u Bah Dipshon L Nongbri bad u Assistant General Secretary la jied ïa u Samran Syiem, katba u Prosper Warjri un dang ïai bteng kum u Treasurer ka SSA.
Ha kane ka sngi la jied ruh ïa ki Secretary kiba ju khmih ïa ki jingïalehkai bapher bapher kum ki Council Member.
Kiwei pat ba la shah jied ha kane ka sngi ki long u Bah Freddy Kharpran kum u Football Secretary, Bah Filing Thangkhiew kum u Women’s Football Secretary, Hockey Secretary u Bah R Mawrie, Badminton Secretary Bah Dister Marbaniang, Archery Secretary Bah Olet Kharsahnoh, Volleyball Secretary Kiran Joshi, Table Tennis Secretary Bah Danny Lyngwi, Basketball Secretary Bah Pynhun Rapthap, Athletics Secretary Bah Auguster Jyrwa bad Physical Culture Secretary Bah Koles Marbaniang.
