Patna, Jylliew:
Ka sorkar Bihar ka la ai hukum ban bteng ha ka ban khang ïa baroh ki skul bad ki jaka ai jinghikai haduh ka 8 tarik, Jylliew namar ka jingjur palat jong ka jingshit.
Ha ka shithi ba la thoh da u Chief Secretary jong ka Bihar u Brajesh Mehrotra sha baroh ki District Magistrates la ong ba baroh ki skul sorkar bad jong ki riewshimet, ki jaka ai jinghikai bad ki Anganwadi Centres ki la khang namar ka jingkiew palat jong ka jingshit ha kaba la ong ba kane kan sa long haduh ka 8 tarik, Jylliew, hadien ba la ïoh hukum na u Myntri Rangbah ka jylla u Nitish Kumar.
U la hukum shuh shuh ïa ki District Magistrate ba ki la dei ban khmih bniah bha ban pyntikna ha ka ban bud ïa ki kyndon ba la buh jong ka State Disaster Management Department.
Kane ka hukum ka buh jingmaham sha ki bor pynïaid jong ki distrik jong baroh ki tnat sorkar ha ka ylla ba ki la dei ban leh bad bud katkum ki kyndon ba la buh.
Namar ka jingkiew jong ka jingshit sha ka 44 Degrees Celsius ha kiba bun ki bynta jong ka jylla, u Mehrotra u la pynlong da ka jingïalang kum shi bynta ban shim ïa ki sienjam na ka bynta ka jingpynkhreh jong ki tnat ba dei khmih ban lah ban ïakhun pyrshah ïa ki jingeh ba mih na ka jingjur palat jong ka jingshit sa na ka bynta ki sngi ban wan ha ka jylla.
