Guwahati, Jylliew:
Ka jingshlei um ha Assam ka dang ktah jur khlem don jingkylla ha kaba ki la don palat 6 lak ngut ki briew ha ki 10 tylli ki distrik kiba la ïakynduh jingeh na ka jingshlei um, la ïathuh ki heh ba dei khmih.
Ka jinghap jong u slap uba jur ha ki bynta jong ka jylla ka la wanrah ïa ka jingshlei jong ki wah, ha kaba kane ka la pynlong ïa ki briew ba kin phet sha ki jaka kiba lait na ka jingshlei um ban ïada ïa ka jingim jong ki.
Ki wah kiba kynthup ïa ka wah Kopili, Barak bad Kushiyara ki la kiew haduh u dak ba don jingma.
Ki la don baroh kumba 6,01,642 ngut ki briew ha Hailakandi Hojai, Morigaon, Karimganj, Nagaon, Cachar, Dibrugarh, Golaghat, Karbi Anglong West bad Dima Hasao distrik kiba dang shah ktah ha ka jingshlei um. Ka jingïap jong ki briew naduh ba la sdang ka jingshlei um ha ka 28 tarik, Jymmang ka la kiew sha ki 15 ngut ngut haduh mynta, la ïathuh ki heh ba dei khmih.
Ka Nagaon ka dang long ka distrik kaba la shah ktah jur napdeng kiba bun na ka jingshlei um ha kaba ki la don palat 2.79 ngut ki briew kiba la shah ktah, ha kaba la bud sa ka Hojai da 1,26,813 ngut bad ka Cachar da 1,12,265 ngut.
Ki la don palat 40,000 ngut ki briew ki bym don jaka sah shuh ha kaba ki la hap ban leit sah ha ki jaka sah ba shipor kiba don ha kylleng ki jaka jong ki distrik. Ka jingpyllait im bad ka jingleit ai jingïarap ïa ki lanot ka dang ïai bteng haduh mynta, ha kaba la ïadon bynta lang da ka kynhun NDRF, SDRF, ki heh sorkar bad ki paidbah. Ka jingïaid jong ki kali, ki rel ka dang shah ktah jur ha kiba bun ki bynta jong ka jylla, la ïathuh shuh shuh ki heh ba dei khmih.
