Washington, Jylliew:
Ha kane ka jingjia, la ong ba uwei u la khlad noh hashen bad 24 ngut kiwei pat ki la ngat bad mynsaw lang ha katei ka jingsynreit kuli naphang kaba la jia hapoh ka nongbah Ohio jong ka United States ha ka Sngi U Blei.
La ong ba katei ka jingsynreit kuli ka la jia ha ka por kumba 5 baje jong katei ka step Sngi U Blei hapoh Akron jong ka nongbah Ohio, ha kaba ki pulit ki la pyntip ba ki don haduh 2 ngut kiba la ngat ha katei ka jingsynreit kuli bad uwei na ki u la khlad noh syndon namar ka jingjur palat ka jingmynsaw. Katba, kitei kiba bun pat ki dei kiba shu mynsaw malu- mala bad ki long tang ki jingmynsaw ki bym da buh jingma ia ka jingim jong ki, hynrei don pat kiba la mynsaw jur shisha ba kiba dang don hapdeng ka jingsumar tad haduh kane ka step Lah Sngi U Blei ba la pynmih ia kane ka khubor.
Ki pulit kiba don ha katei ka jaka, hajan ka surok Kelly Street bad ka 8th Avenue, ki la lap ia bun tylli ki kuli bad ki suloi kiba la saphriang ha katei ka jaka ba katei ka jingïasiat ka la jia ha katei ka step phyrngap.
Hynrei, kim pat shym la lap ne ioh kem pat ïano- ïano ruh kiba don kti ha katei ka jingjia bad ki pulit ki dang pynlong ka jingtohkit kaba bniah da kaba bud-dien ruh ia kito kiba ïadon ha katei ka jaka ha katei ka sngi.
U heh ka Akron, u Shammas Malik bad u heh pulit katei ka thaiñ- u Brian Harding hadien katei ka jingjia ki la pyntip ba ki dang phah wad bniah bad buddien bha halor katei kaba la jia ha katei ka step bad ba kin shim ruh ia ka rai kaba eh pyrshah ia kito kiba don kti ha katei ka jingjia baroh.
Namar la ong ba ki bor pyniaid jong katei ka thaiñ ki la sakhi ia bun tylli ki jingjia iakynad bad khamtam kum kitei ki jingsynreit kuli naphang ha katei ka nongbah bad kumta ruh ki la pynpaw ka jingsngewkhia kaba jur halor katei ka jingjia ha katei ka sngi kaba la shim ia ka jingim jong uwei na kitei kiba ngat ha katei ka jingjia bad uwei pat uba la mynsaw jur bha.
Kumjuh ruh na ka liang ki bor pyniaid katei ka nongbah, ki la kyntu ia kino- kino kiba don jingtip ne sakhi ia katei ka jingjia, ba mih shakhmat ban ai jingtip ha ki pulit ia kaei kaba la jia baroh ha katei ka sngi, kum shi bynta ban long ka jing iada bad ban lah ruh ban tehlakam noh ia kum kitei ki jait jingjia nangne shakhmat.
