Mawkyrwat, Jylliew 03
Ka seng Hynñiewtrep Integrated Territorial Organisation (HITO) Mawranglang Zone ha ka Lah Sngi U Blei ka la leit ban ïakynduh ïa u Jimmison Marweiñ ha ïing sah jong u ha Mawrang-lang ban ai khublei kitbok kitrwiang ïa une u samla u ban sa leit mihkhmat ïa ka Jylla ha ka rynsan ïakhun kti ka ban sa long ha Maharashtra.
Ha kane ka sngi la ïadonlang u samla Paul Thyrniang, President HITO SWKHD, samla Bitnam Nongsiej , Presi-dett ka HITO Mawkyrwat Zone, Shemphang Kharsyiemlieh, Publicity Secretary Mawrangzone bad kiwei kiwei.
Ka seng ha kane ka sngi kum ka dak ka jingai mynsiem ïa u Jimmison ka la noh synñiang da ka song pisa khyndiat khynsoit bad ka la kitbok kitrwiang ba un ïalehkai bha bad wanrah nam wanrah burom ïa ka district bad ka jylla hi baroh kawei.
Kum ban shu kdew u Jimmison Marweiñ ba dang 18 snem ka karta u dei u samla uba dang shu sdang ïa ka kam ïalehkai Arm Wrstleing ha u snem 2023. Hynrei une u samla dang ha kine khyndiat snem u la pyni shisha ïa ka sap ka talent ha kaba u la ïoh ban khur ïa ka takma ksiar ha ka 5th Meghalaya Game kaba la long ha Tura hapoh ka kyrdan ïakhun 65 kg, kumjuh ruh ha ka lympung 33rd Annual State Level Arm Wrestling Championship 2024 ba pynlong da ka MAWA u la ïoh ban khur ïa ka takma ksiar jong ki senior bad junior, katba ha Mawkyrwat u la ïoh ban khur ïa ka Over The Top ha ka Amateur Category ba la pynïaid da ka Arm Wrestling Association jong ka SWKHD.
