Ha ka 4 tarik Jylliew, ka pyrthei baroh kawei kan tip ïa ki kyrteng jong ki 543 ngut ki MP bathymmai jong ka Ïingdorbar Thawaiñ Lok Sabha kaba 18. Hadien ka jingthep ‘vote’ kaba la don haduh hynñiew wat, ngin sa tip ïa ka jop ka rem jong ki kyrtong kiba ngi la kyrshan ha ka sngi thep ‘vote’. Na ka liang ka Election Commission ka Ri India (ECI) ka la pyntip ha ka 3 tarik Jylliew ba ka India ka la thaw ïa ka ‘World Record’ hadien ba 64.2 klur ngut ki nongthep ‘vote’, ba kynthup ïa 31.2 klur ngut ki kynthei, ki la ïashim bynta ha ka ilekshon MP Lok Sabha mynta u snem. Da shisha, kane ka long kaba ïar haduh katta-katta bad ki Ri kiba jan bad ba jngai kin hap shu peit lyngngoh. Kam dei ka kam kaba suk ban pynlong ilekshon ha India namar ka ïar shaba palat na ka daw jong ka jingheh jong ka Ri bad ka jingbun paid. Wat lada ka long sa kumno-kumno ruh, ngin hap ban ai jingïaroh ïa ki nongpynïaid ïa ka ilekshon kiba la pynthikna ba kam shym la don ka huri-hura ne jingïakynad kaba jur kumba ngi la sakhi ha ki snem kiba mynshwa.
Ngi kyrmen ba ka jubab ka ban mih lashai ka sngi kan long kaba neh baroh san snem khnang ba ngin lait na ki sorkar kiba neh tang katto katne por. Ngi la mad bad ïohi ïa ki sorkar kiba la don tang katto katne bnai ha ka bor bad la hap ban pynlong ilekshon da ka bathymmai. Ka la long shisha ka jingduhnong ïa ka Ri baroh kawei na ka jingdon ilekshon khah-khah. Ngim tip haduh katno ki paidbah kin ai jingkyrshan ïa ka BJP lane Congress lane National Democratic Alliance (NDA) lane Indian National Developmental Inclusive Alliance (INDIA), tangba kiba bun pat ki angnud ban ïoh da ka sorkar ka bakhlaiñ, baskhem, baneh bad ka ban synshar katkum ki aiñ bad ki kyndon khlem da peit ne leh shiliang khmat ïano-ïano. Ka lah ban long ba u Myntri Rangbahduh ka Ri uba mynta, u Narendra Modi, un dang wanphai biang ha ka sien kaba lai bad ka lah ban long ruh ba ngin ïoh da u Myntri Rangbahduh u bathymmai. Long katba long, ngim dei ban shah pharia pat namar ka ilekshon lane ka jop ka rem jong ki kyrtong bad ki seng saiñpyrthei.
Haba phai sha ka jylla lajong, ki kyrtong kiba la tyrwa ïalade ban long ki MP Lok Sabha na Shillong Parliamentary Constituency ki kynthup ïa u MP ba mynta, u Bah Vincent H Pala na ka seng Congress, ka Kong M Ampareen Lyngdoh na ka National People’s Party (NPP), u Dr Ricky Andrew J Syngkon na ka Voice of the People Party (VPP), u Bah Robertjune Kharjahrin na ka United Democratic Party (UDP) da ka jingkyrshan lang ka Hill State People’s Democratic Party (HSPDP), bad ki arngut ki kyrtong khlem seng lane ‘Independent’, u Dr Lakhon Kma bad u Bah Peter Shallam. Na Tura Parliamentary Constituency, ki nongïakhun ki kynthup ïa ka MP ba mynta, ka Agatha Kongkal Sangma na ka NPP, u Saleng A Sangma na ka Congress, u Zenith M Sangma na ka All India Trinamool Congress (AITC), bad u Labenn Ch. Marak kum u kyrtong khlem seng (Independent).
Ha ka ilekshon MP ha u snem 2019, na ka 1-Shillong Parliamentary Constituency, ki la don 11,97,806 ngut ki nongthep ‘vote’, bad na kine, 7,84,279 ki la ïashim bynta ban ‘vote’ katba na ka 2-Tura Parliamentary Constituency, na ka 7,16,990 ngut ki nongthep ‘vote’, 5,83,480 ngut ki la thep ‘vote’. Haba la kheiñ kyllum, ka jingwan thep ‘vote’ ha kato ka snem ha baroh artylli ki konstitwensi ka la poi sha ka 13,67,759 ngut na ki 19,14,796 ngut lane 71 na ka 100 (71 per cent). San snem mynshwa, na ka Shillong Parliamentary Constituency, u Bah Vincent H Pala na ka Congress, u la long u lahduh ha kaba u la tam da haduh 1,52,443 ‘vote’ ïa u kyrtong uba wan ba ar na ka seng United Democratic Party (UDP), u Bah Jemino Mawthoh, katba na Tura, ka Agatha K Sangma na ka NPP ka la jop bad ka la tam da 64,030 ‘vote’ ïa u kyrtong ka seng Congress uba la wan ba ar, u Dr Mukul M Sangma. Ha kato ka ilekshon, u kyrtong ka BJP na Shillong, u Bah Sanbor Shullai, u la ïoh kumba 75,790 ‘vote’ katba u Rikman G Momin na Tura, u la ïoh tang 31,384 ‘vote’.
Ha ka ilekshon kaba la long ha ka 19 tarik Ïaïong, ha Shillong Parliamentary Constituency, na ki 14,00,411 ngut ki nongthep ‘vote’, kiba la mih shakhmat ban jied ïa u MP bathymmai ki long 10,33,251 ngut (73.78 per cent) kata ha Tura Parliamentary Constituency, na ki 8,26,156 ngut ki nongthep ‘vote’, kiba la wan ban thep ‘vote’ ki long 6,72,284 ngut (81.37 per cent). Lashai ngin sa tip shai kdar mano kita ki arngut ki MP ki ban mihkhmat ïa ka Shillong bad Tura ha Lok Sabha. Hynrei ngin hap ban ïa pdiang ïa ka rai jong kiba bun ba lang namar ka rukom ka long mynta ha ka jingïakhun ilekshon ha Ri India. Ngi lah ban ïoh da kijuh ki MP kiba la jop ha u snem 2019 lane ngi lah ban ïoh da ki bathymmai. Ka rai ka shong ha ki paidbah ba bun bad kata ka rai kan sa paw shai ynda la khylliew bad ñiew ïa ki ‘vote’ kiba don ha ki kor ‘Electronic Voting Machine’ (EVM) bad ki ‘Ballot Paper’. Ngi kyrmen ruh ba ka sngi ñiew ‘vote’ kan long kaba ïaid beit, ïaid ryntih bad kaba lait na kino-kino ki huri-hura bad jingïakynad bad ba ki nongshong shnong kin pdiang ïa ka rai jong kiba bun ki nongthep ‘vote’.
