Guwahati, Jylliew:
Hadien ba la lap ïa ka metïap jong u nongïalam ka seng BJP ha Lakhimpur, ha kaba la ïohi ïa ki dak jong ka jingshah thang bad ka jingjah jong ka khlieh ha ka Sngi Saitjaiñ, ka sorkar jylla ka la pyntreikam da ka kynhun CID bad ka kynhun wad bniah ban tohkit halor ka jingjia.
Ïa une uba la ïap la tip kyrteng kum u Sunil Gogoi, uba long u kontraktor jong ka Jal Jeevan Mission bad u nongïalam jong ka seng BJP ha Lakhimpur. Ïa ka metïap jong u la lap ha ka janmiet jong ka sngi Saitjaiñ ha ka jaka kaba don hajan ka ïingsah jong u ha ka thaiñ Dhakuakhana. U Myntri ka tnat pule-puthi jong ka jylla u Ranoj Pegu u la leit jngoh bad leit sngewlem sha ka ïingsah jong u Gogoi ha ka Sngi U Blei.
“Nga la leit jngoh ïa ka ïing jong u Sunil Gogoi…leit jurip ïa ka jaka ba la lap ïa ka met jong u, kumba la ïohi la ong ba kane ka jingshah pynïap ka dei ka kam sniew ba la mut lypa,” la ong u Mytnri ha ka jingpyllait khubor, ha kaba u la kyrpad ba la dei ban pynsted bad pynkloi ha kaba ïadei bad ka jingtohkit halor ka jingjia. U G P Singh, uba long u DGP jong ka Assam, u la ong ba ka kynhun Assam CID bad ka Forensic Science Laboratory, ba la lamkhmat da u IG, CID, ki la shah pyntreikam ha ryngkat ka jingïarap jong ki pulit na ka bynta ban buddien bad tohkit bniah halor ka jingjia.
