New Delhi, Jylliew:
U Myntri Rangbah jong ka Delhi u Arvind Kejriwal u la leit phai biang sha Tihar Jail ha ka janmiet jong ka Sngi U Blei hadien 21 sngi ba shah pyllait jamin kaba u la kyrpad na ka Supreme Court ban ïoh leit ïalap ilekshon ha ka ilekshon Lok Sabha kaba dang kut shen.
U la leit ban aiti ïalade hakhmat ki heh ba dei khmih jong ka patok kaba u la shah set ha ka por 5.30 janmiet, hadien ba u la dep ban leh burom ha u mot sah kynmaw jong u Mahatma Gandhi ha Rajghat, dep duwai ha Hanuman Temple kaba don ha Connaught Place bad ai jingkren sha ki nongïalam jong ka seng Aam Aadmi Party (AAP) bad kumjuh sha ki nongbud jong ka seng ba la pynlong ha ka shlem treikam jong ka seng.
Khyndiat kynta hadien ka jingleit aiti jong u, ïa u Kejriwal la ïalam hakhmat ka ïingbisahr, ha kaba la hukum ban set ïa u haduh ka 5 tarik, Jylliew na ka bynta ban pynlong ïa ka jingtohkit halor ka jingkyrpad jong ka kynhun Enforcement Directorate (ED), kaba la kem ïa u halor ka jingkynnoh ba u la donkti ban pyntreikam beaiñ bad pyndkoh ïa ka jingpyntreikam hapoh ka tnat Excise ha Delhi ha u snem 2021-22.
