Bengaluru, Jylliew:
Ka seng Congress bad ka Bharatiya Janata Party (BJP) ha ka Sngi U Blei ki la pynbna ïa ka thup kyrteng jong ki kyrtong ki ban ïakhun ha ka ilekshon Member of Legislative Council (MLC) ka ban long ha ka 13 tarik, Jylliew.
Ki kyrtong ba la pynbna da ka seng Congress ki kynthup ïa ki kyrteng jong u Myntri ka Science and Technology jong ka Karnataka u N S Boseraju bad u khun jong u Myntri Rangbah ka jylla u Siddaramaiah u Yathindra Siddaramaiah, u Political Secretary jong u Siddaramaiah u K Govindaraj, u MLC barim u Ivan D’Souza, u Chairperson barim jong ka Minorities Commission hapoh ka jylla u Balkees Banu bad u President jong ka seng ha Kalaburagi distrik u Jagdev Guttedar. Nalor kine, ka seng ka la pynbna ruh ïa ka kyrteng jong u Basanagouda Badarli kum u kyrtong jong ka na ka bynta ban ïakhun ïa ka ilekshon shiteng samoi jong ka MLC wat lada ïa ka tarik na ka bynta kane ym pat pynbna.
Kane ka konstitwensi ka la sah thylli hadien ka jingiehnoh kam jong u Myntri Rangbah barim u Jagadish Shettar, uba la pynïasoh bad ka seng Congress hadien ba u la mih noh na ka seng BJP hadien ba um shym ïoh ïa ka tiket ha ka jingïakhun ïa ka ilekshon Assembly ha u snem 2023.
Hadien ba u la shahrem ha ka jingïakhun ïa ka ilekshon Assembly na ka tiket jong ka seng Congress ha u snem 2023, u Shettar u la leit phai biang sha ka seng BJP bad mynta u la ïakhun ïa ka ilekshon Lok Sabha na Belgaum (Belagavi) konstitewnsi pyrshah ïa u Mrinal Hebbalkar jong ka seng Congress, uba dei u khun jong ka Myntri ba dei khmih jong ka State Women and Child Development ka Laxmi Hebbalkar.
Na ka bynta ki 7 tylli ki konstitwensi ha ka ilekshon MLA, ki la don palat 300 ngut ki nongïalam jong ka seng Congress bad ki nongbud jong ka kiba la pan tiket ban long nongïakhun, la ïathuh u President jong ka seng ha ka jylla u DK Shivakumar dang shen.
Ha kaba ïadei bad kane, ka seng BJP ka la pynbna ïa ka kyrteng jong u Myntri barim u CT Ravi, u MLC ba mynta u N Ravikumar, bad u nongïalam jong ka seng u MG Muley kum ki kyrtong ban ïakhun ha ka ilekson MLC.
