Shillong, Jylliew 03
Ka ïew kyntiap klob ne ka inter club transfer jong ka Shillong Sports Association (SSA) ka la sdang ha ka Lah Sngi U Blei hapoh kane ka shlem treikam jong kane ka synjuk ïalehkai.
Ha kane ka sngi sdang ki la don 28 ngut ki ‘rang ïalehkai kiba la wan ban soi ha ka miej jong ka SSA na ka bynta ban kyntiap sha kiwei pat ki klob thymmai kiba ïashim bynta ha la ki jong ki kyrdan ïalehkai mynta u snem naduh ka Shillong Premier League, First, Second, Third haduh ka Fourth Division.
Kane ka ‘inter club transfer’ kan bteng man la ka sngi naduh ka por 3 haduh 5 baje janmiet ka ban pynkut ha ka 8 tarik mynta u bnai bad la khmih lynti ban kin nang bun ki ban wan poi hapoh ka miej jong ka SSA.
Na ka liang u Secretary kane ka synjuk, Bah Dipshon Nongbri, u la ïathuh ba ynda la lah ban pyndep ïa kane ka jingsoi ïa ki rangïalehkai ka SSA kan sa sdang noh ïa ka lympung ïalehkai Fourth Division mynta u bnai.
