Shillong, Jylliew 04
U khlur ïalehkai ka ri uba la bat ïa ka kyrdan ba saw ha ka pyrthei u Rohan Bopanna u la jied ïa u N Sriram Balaji, uba la lah ban ïalehkai ba ha ka French Open, kum u paralok ban ïalehkai lang na ka bynta ka Paris Olympics bad ka All India Tennis Association (AITA).
U Bopanna uba la 44 snem ka rta u la thoh sha ka AITA ban kynthup lang hapoh ka TOPS halor ka rai ka jong u bad ïa kane la pynthikna da katei ka synjuk. U Balaji lem bad u paralok ba ïalehkai lang na Mexico u MA Reyes-Varela Martinez ki la ïakhun pyrshah ïa u Bopanna bad u Matthew Ebden na Australia hashwa ban kin mad ïa ka jingshah rem ha ka wat kaba lai jong ka men’s doubles ha ka lah sngi U Blei.
U Bopanna, u la long uba lai na ki nongïalehkai ka ri ban khur ïa ka nam jop ha ka Grand Slam, u la don jingkyrmen ban khur takma ha ka Rio Games, hynrei ma u lem bad ka Sania Mirza ki la duh noh ïa ka takma rnong hadien ba ka jingshah rem ha ka mixed doubles na ki nongïalehkai na Czech Republic kata u Radek Stepanek bad ka Lucie Hradecka.
“Nga la phah lyngba ka email sha ka AITA,” la pynpaw u Bopanna na Paris, da kaba bynrap da kaba ong ba un hap ban jied hi ïa u pralok ban ïalehkai lang.
U Yuki Bhambri uba la 31 snem ka rta u la shah rem ha ka wat kaba nyngkong ha ka French Open ryngkat u paralok ba ïalehkai lang na France u Albano Olivetti, hynrei ki la lah ban pynpaw ïa ka jingtbit ha kane ka aïom da kaba khur jingjop ha ka ATP 250 tournament ha Munich bad wan ha ka kyrdan ba-ar ha ATP 250 kaba la long ha Lyon lem bad utei u paralok.
Na ka liang u Secretary General ka AITA u Anil Dhupar u la ong ba um shym la don eiei ban kyntait ïa u Bopanna halor ka jingthmu ban ïalehkai lang bad u Balaji, uba bat ïa ka kyrdan ba 84, ha ka Paris Olympics.
“U Rohan u la thoh sha ngi ba u kwah ban ïalehkai lang bad u Balaji. U Balaji u la long u rangïalehkai uba tbit. U la lah ban ïalehkai bha ha Pakistan, kumjuh ha ka French Open. Ngim don eiei ban pyrshah lada u Rohan u kwah ban ïalehkai lang bad u,” la ong u Dhupar.
