Guwahati, Jylliew:
Ki pulit jong ka Assam ki la lap ïa ka song jong ki dawai jyrhoh ba la thmu ban shalan sha ki ïew die jong ki jingdih pynbuaid. Ïa kane ka jingpyntreikam la pynap shrip ha Churaibari Checkpost ha khappud Assam-Tripura haba ka trok kaba la wan na Guwahati bad thmu ban leit sha Agartala ka la shah khang lynti ha ka Sngi Saitjaiñ.
Ha ka por ba la don ka jingkhmih bniah kumba ju pyntreikam man ka sngi, ki heh pulit ki la ïoh bat ïa kane ka trok kaba la kit ïa kiba bun ki tiar Online, bad kumjuh ïa ki song jong ka dawai jyrhoh ”Eskuf’, ka dawai jyrhoh kaba la ju pyndonkam bakla da kito kiba la kyrni ha ki jingdih pynbuaid.
Ki la don baroh kumba 3,300 tylli ki bitor dawai Eskuf, ba la thep ha ki ar tylli ki synduk kot, ba la ïoh ban kurup, ha kaba kumba la antad na ka ïew bar ri la ong ba kine ki dawai ki la kot sha ka `. 1.6 Million.
Ïa u nongñiah jong kane trok la tip kyrteng kum u Sonu. Une u la shahkem bad shah pynngat ruh ha ka kyndon aiñ Narcotic Drugs and Psychotropic Substances (NDPS) Act.
Kane ka jingïoh ban kurup ka la long ha ki lai sngi lynter jong ka jingïoh kurup drok ki pulit jong ka Assam halor ka jingthmu ban tehlakam ïa ka jingdon jong ki kam khaïi drok ha ka thaiñ bad ka jingwanrah na kiwei pat ki jaka ba nabar ka thaiñ.
Kane ka jingpyntreikam ka la ïai bteng na ka por sha ka por naba la sakhi ïa ka jingjur jong ki kam khaïi drok ha ki bynta khappud. Kumba la sakhi, la ong ba ka jingïohlad jong ki runar ban pynïaid ïew ïa u drok bad kiwei pat ki jingdih pynbuaid sha ki bynta jong ka ri ka buh jingma ïa ka lawei jong ki nongshong shnong khamtam jong kito kiba sah ha ki bynta khappud bad kumjuh ha kylleng ki bynta jong ka ri.
Ha kaba ïadei bad kane, la ong ba ka la don ka jingkhuslai shaphang ka jingdonkam jong ki pulit ka Tripura ban ïakhun pyrshah ïa ki kam khaïi drok, naba kim shym la don kino kino ki khubor jong ki jingïoh kurup drok ha ki thaiñ ba hap hapoh ka jingkhmih jong ka Tripura wat lada ki la don shibun ki jingjia jong ki jingkurup drok ha Churaibari Checkpoint.
Ha kaba ïadei bad kum kane ka jingjia ha ka 13 tarik, Lber, ki pulit jong ka Assam ki la ïoh ban kurup ïa kiba bun ki dawai jyrhoh bad kem ïa arngut ki briew ha khappud Assam-Tripura.
Ha kaba ïadei bad kane ka jingja, hadien ba la ïoh jingtip na ki kynhun wadbniah, la ïoh ban bat ïa kawei ka trok ha Churaibari Check Post, ha kaba la ïoh ban kurup ïa kumba 193 tylli ki synduk ba la thep ïa ki dawai jyrhoh jong ka Eskuf bad Phensedyl.
Ïa kine ar ngut kiba la shahkem la tip kyrteng kum u Sadananda Ray bad u Sanjay Ray jong ka West Bengal, bad kine ki la shah pynngat ha ki kyndon halor kane ka jingdonkti jong ki ha kane ka kam beaiñ.
