Shillong, Jylliew 04
Ka Germany kan pynkhlaiñ ïa ki bor pahara na ka bynta ban pynkhreh ïa ka European Championship ka ban sdang naduh 14 tarik mynta u bnai hadien ka jingshah byrngem ha ki kynhun kieng atiar kynthup ïa ki ISIS, ki nongpynkulmar, ki riewshimet bad ki jingthombor lyngba ki kor ki bor, la ong ka Interior Minister ka Nancy Faeser ha ka sngi Ba-ar.
Ka jingthmu ban wan sakhi haduh 2.7 million ki paidbah ‘riew ieit phutbol kylleng jong kane ri bad kumba 12 million ki paidbah ki ban wan nabar ri, ka Faeser ka pynpaw halor ka jingdonkam ban pynkhlaiñ ïa ki bor pahara hadien ka jingshah thombor dangshen.
Ka Faeser ka la pynpaw halor katei ka bynta wat la ym shym la don kiba la kam halor katei ka jingbyrngem, hynrei ka Germany ka long ba la pynkhreh khnang ban wanrah ka jingshong shngaiñ na ka bynta katei ka lympung. “Phin ym lah ban ong shispah na ka shispah ka jingpynbiang ïa ki bor pahara, hynrei ngi la long ba la pynkhreh bad ban long kiba peitngor,” ka la pyntikna da kaba ong ba la pynbiang ïa ki bor pulit hadien 16,000 ngut ki volunteer.
Kane ka jingpynkhlaiñ ïa ki bor parara ka long hadien ka jingjia mynta ha ka sngi Thohdieng ha kaba uwei u briew uba dang 25 snem ka rta u la pynmynsaw ïa ki hynriew ngut ki briew ha Mannheim, ha kaba uwei u pulit u la khlad noh namar ka jingmynsaw, hynrei utei u briew u la shah siat kylla ha ki bor pulit.
