New Delhi, Jylliew:
Ka nongïalam jong ka seng BRS ka K Kavitha kaba la shahkem ha u ‘nai Lber halor ka jingshah kynnoh ba ka la donkti ha ka jingklop tyngka kaba la mih na ka jingpyndkoh treikam hapoh ka tnat Excise ha Delhi, ka la pyndam bad pynkhuid noh ïa phra tylli ki Mobile Phone kiba don ïa ki sabut halor ka jingjia, la ong ka kynhun Enforcement Directorate ha ka Lah Sngi U Blei ha kaba ka la bynrap shuh shuh da kaba ong ba la nang ujor shuh shuh ïa ka jingmudui pyrshah ïa ka.
Ka kynhun ED ka la kynnoh ruh ïa ka Kavitha ba ka la ïasuhbuit sniew bad ka ‘South Group’ ban siew sha ka seng AAP kaba bat ïa ka jingsynshar ha Delhi da kumba T. 100 klur da kaba ïakylliang da ki Licenses die kyiad.
Ka ïingbishar ha Delhi ha ka Lah Sngi U Blei ka la nang pynjlan shuh shuh ha kaba ïadei bad ka jingset ïa ka K Kavitha haduh ka 3 tarik, Naitung ha kaba ïadei bad ka mukotduma halor ka jingshah kynnoh donkti na ka jingkamai ïa ka spah beaiñ kaba don jingïadei bad ka kam bamsap kaba la mih lyngba ka jingdie kyiad ha Delhi.
Lai ngut kiwei pat kiba la shah kynnoh ha kane kajuh ka mukotduma kiba kynthup ïa u Prince, Arvind bad u Damodar ki la shah pyllait jamin ha ka Rouse Avenue Court ha ryngkat ka jingïakut kaba T. 1 lak. Ka ïingbishar ba kyrpang ka Kaveri Baweja ka la rai ban nang pynjlan shuh shuh ban set bad tohkit hadien ba ka Kavitha ka la shah ïalam sha ïingbishar ha ka Lah Sngi U Bleii.
Ka ïingbishar ka la buh jingmaham pyrshah ïa ka hadien ba la ïoh jingtip halor ka jingdon ka jingshah mudui pyrshah ïa ka nongïalam jong ka seng BRS ha kaba ïadei bad ka jingjia ha ka 29 tarik, Jymmang.
Hashwa kane, ka ïingbishar ha Delhi ka la kyntait halor ka jingkyrpad jamin jong ka ha kaba ïadei bad kane ka jingjia, ha kaba la ong ba ka Kavitha ka lah ban leh donbor halor ki nongsakhi bad kan sa lah ban shim kabu lada ka shah pyllait jamin.
Ka Kavitha ka la shah set patok halor ar tylli ki mukotduma ba la mudui da ka kynhun ED bad ka kynhun CBI ha kaba ïadei bad ka jingdkoh treikam hapoh ka tnat Excise.
Ka Kavitha, kaba dei ka khun jong u Myntri Rangbah barim jong ka Telangana u K Chandrashekar Rao, ka la shahkem ha ka kynhun ED na ka jaka sah jong ka ha Banjara Hills kaba don ha Hyderabad ha ka 15 tarik, Lber.
