Pyntikna u Dravid ban shimti khatduh ïa ka kynhun ïalehkai ka ri ha ka T20 World Cup

Shillong, Jylliew 04

Ka lympung ïalehkai ka ban long ha USA bad West Indies kan long kaba khatduh eh na ka bynta u Rahul Dravid ban shimti kum u coach ïa ka kynhun ïalehkai ka ri India na ka bynta ka ICC Men’s T20 World Cup.

Ha shwa ba ka India kan pynkhreh ïa ka jingïakhun kaba nyng-kong pyrshah ïa ka Ireland ha ka Sngi Balang ha New York, u Dravid u la pynpaw ba un ym ïakhun shuh na ka bynta ban ïoh biang ïa katei ka kam hadien ba ka BCCI ka la dep ban khot tender naduh u mynshem bnai.

“Kan dei ka lympung ïalehkai kaba khatduh eh ïa nga ba ngan shimti ïa kane ka kam kumba katto katne snem bad ngan ym ïakhun shuh ïa kane ka kam,” la ong u Dravid.

“Kane kan dei kaba khatduh eh ïa nga. Hynrei kane ka lympung kan ym don jingïapher eiei na nga.”

“Nga sngewtynnad eh ïa kane ka kam. Nga ïoh ban lehkmen kum u coach ïa kane ka kynhun bad ka dei ka por kaba kyrpang eh ïa nga bad ka long kaba sngewtynnad ban ïatrei lang bad kane ka kynhun.”

“Ngi la lah ban ïalehkai bha ha kum kine ki lympung ïalehkai World Cup bad ngi la lah ban pynurlong ban jam sha ka semi final ha ka sien kaba nyngkong eh ha ka T20 kaba la long ha Australia,” la bynrap u Dravid.

“Ka World Test Championship ka don ka jingïapher khyndiat na kane ka lympung, hynrei ka lam ïasyriem.”

“Ka 50-over World Cup ngi la lah ban ïalehkai bha bad ngi la lah ban pynurlong ban jam shaduh ka final. Ha kaba ïadei bad ki lympung ïalehkai kiba heh ngi la lah ban ïalehkai bha bad nga sngew ban ong ba ka la long nawei napdeng ki kynhun kiba kynsai.”

“Ngim lah ban ong ba ngim shym la lah ban ïalehkai bha ha kine ki lympung. Hooid ngim shym la lah ban jam shaduh ka quarter final. Hynrei ngi kyrmen ban ïalehkai na ka bynta ban jam sha ki kyrdan ba kham shakhmat.”

“Hynrei kaba kham kongsan ka long haba ngi sdang ha kum kine ki lympung ngi donkam ban ïalehkai bha. Nga sngew ban ong ba kan long kaba eh ban khur ïa ka jingjop ha kane ka lympung, hynrei ngi donkam ban ïalehkai bha na ka bynta ban kynjoh sha ka thong lyngba ka jingïatylli lang kum ka kynhun hi baroh kawei,” u la bynrap.

Kane ka kynhun jong u Dravid ka don ha ka Group-A kaba kynthup lang ïa ka USA, Canada, Ireland bad ka Pakistan.