Shillong, Jylliew 04
Na ka bynta ban pynkhlaiñ ïa ka kynhun ïalehkai jong ka Al Nassr ha ka aïom ka ban wan, u Ronaldo un pyrshang ban wanrah ïa ki para nongïalehkai barim ka Real Madrid sha kane ka klob kaba na Saudi Arabia.
Kumba ka paw u Ronaldo um shym la lah ban pynurlong ha kane ka aïom ha kane ka katei ka klob ka la shah rem noh ha ka final jong ka Saudi Cup hadien ba ka la shah rem da 1-0 kol ha ka Al Hilal. Te kumta u Ronaldo u la mih na madan ha ryngkat ki jingjaw ummat hadien ka jingshah rem ha katei ka jingïakhun. Kane ka mut ba u Ronaldo um shym la lah ban pynurlong ïa ki ar tylli ki aïom ïalehkai ha Saudi Arabia khlem da la lah ban pynurlong ïa ka nam jop.
Te kumta na ka bynta ban pynkhlaiñ ïa ka kynhun ïalehkai jong ka Al Nassr na ka bynta ka aïom ka ban wan, un pyrshang ban wanrah ïa ki para nongïalehkai barim ka Real Madrid sha ka Al Nassr.
Ka jingshah rem ka Al Nassr ha ka final ka la wan hadien saw sngi ba ka la shah rem ha ka Saudi Pro League jong ka aïom ba la lah. Te kumta ka Al Nassr ka la wan ha ka kyrdan ba-ar ha kane ka lympung ha kaba ka la duna haduh 14 point hadien ïa ka Al Hilal. U Cristiano Ronaldo u la thep 35 kol bad ïarap pynbuh 11 sien sha ka Saudi Pro League jong ka aïom ba la lah.
Kat kum ki khubor la ong ba u Ronaldo mynta u la pyrshang ban khroh ïa ki para nongïalehkai barim na ka Real Madrid ba leit ïalehkai noh sha Riyadh. Ki khubor ki la kam ba u Ronaldo u la ïoh ban ïakren ïa ki rangïalehkai barim ka Real Madrid kiba kynthup ïa u Nacho Fernandez bad u Casemiro na ka bynta ban pynkohnguh ïa ki ban soi ïa ka kontrak na ka bynta ka Al Nassr.
Ki khubor ki ïathuh ba u Nacho Fernandez u la iohpdiang ïa katei ka jingtyrwa, hynrei u la rai ban leit sha United States na ka bynta ban ïashim bynta ha ka Major League Soccer (MLS). Dangshen u Nacho u la lah ban pynurlong ïa ka Real Madrid u la ïadon bynta ban khur ïa ka nam lahduh kaba 15 ha ka Champions League.
Ha kawei pat ka liang u Casemiro u la paw kum uwei uba la shah tyrwa ha ka Al Nassr. Une u rangïalehkai shapdeng um shym la lah ban ïalehkai bha na ka bynta ka Manchester United ha ka aïom ba la lah. Watla um shym la lah ban ïalehkai bha na ka bynta katei ka klob kaba na Old Trafford ha ka aïom ba la lah bad uba la ïoh ïa ka jingsiew kaba £350,000 ha ka shi taïew, hynrei u Casemiro u la thmu ban leit ïasoh sha ka Al Nassr ha kane ka aïom lyiur.
