Imphal, Jylliew:
Ha kawei ka jingpyntreikam, ki la don lai ngut ki dkhot jong ka kynhun Kangleipak Communist Party (KCP-Apunba City Meitei) kaba la shahñiew beaiñ kiba la shahkem ha Thoubal distrik jong ka Manipur, ha ryngkat ki tiar siat bad ki kuli ïasiat.
Kine kiba la shahkem ki la donkti ha kiba bun ki kam pyntriem kiba la jia ha ki thaiñ ba shaphang Shathie jong ka Manipur ha kine ki khyndiat taïew ba la leit. Ïa ka jingpyntreikam ban leit thwet ïa ki lehnoh la pynlong da ka kynhun Commandos (CDOs) jong ki pulit ka Manipur bad ki shipai jong ka tnat Assam Rifles.
Ïa kine ki dkhot jong ka kynhun lehnoh kiba la shahkem la tip kyrteng kum u Louriyam Suresh Singh (28) na Imphal East distrik, u Lairenlakpam Dineshchandra Singh (30) na Thoubal distrik bad u Konsam Anao Singh (26) na Imphal West distrik jong ka Manipur.
Ïa kine kiba la shahkem bad ïa ki tiar ba la ïoh ban kurup la aiti sha Lilong Police Station kaba don ha Manipur. Ka la don ka jingujor ha kaba ïadei bad ka jingjia bad pynngat ha kiba bun ki kyndon jong ka aiñ, la ïathuh ka tyllong khubor.
