Shillong, Jylliew 04
Ka jingïai ap khmih lynti kaba la slem jong ka Real Madrid ka la wan urlong hadien ba pynbna ba u khlur ïalehkai World Cup ka France u Kylian Mbappe u la pynïasoh sha kane ka kynhun kaba na Los Blancos.
“Ka Real Madrid C.F. bad u Kylian Mbappe ki la poi sha ka jingmynjur lang ïa ka jingïateh soskular ha kaba un long noh u rangïalehkai ka Real Madrid na ka bynta ki san tylli ki aïom ïalehkai,” la pynpaw kat kum ka kyrwoh ba la pyllait na ka Real Madrid.
U Mbappe u la pynbna ïa kane ka khubor hapoh ka rynsan social media lade, ha kaba une u rangïalehkai na France u la pynpaw ïa ka jing-sngewkmen ban pynïasoh sha ka klob kaba u la thrang ha ka jingim ïalehkai jong u. “Ka jing-angnud ka la wan urlong ha ka jingim jong nga, te nga sngewkmen bad nga da sngew sarong ban pynïasoh sha kane ka klob kaba la phohsniew baroh shi katta,” la bynrap une u khlur ïalehkai shapdeng hadien ba u la mih noh na ka PSG.
“Ym don ba lah ban sngewthuh haduh katno ka jingkmen ka jong nga mynta. Ngam sngew lah shuh ban ap na ka bynta ban ïoh ïalehkai noh na kane ka klob thymmai bad nga ai khublei ïa kito baroh kiba la kyrshan ïa nga.”
Kane ka long ka khubor kaba pynkmen ruh ïa kane ka kynhun ïalehkai jong ka lympung La Liga namar ka la wan urlong tang hadien lai sngi ba ka Real Madrid ka la ïoh ban khur ïa ka nam lahduh kaba khatsan (15) sien ha ka Champions League hadien ba la la lah ban pynliem noh ïa ka Borussia Dortmund da 2-0 kol.
Na ka liang ka Real ka la ai khublei khatduh ruh ïa ki khlur ïalehkai kane ka klob kiba kynthup ïa u Toni Kroos, Luka Modric bad u Nacho Fernandez. Hynrei mynta kane ka klob ka la lah ban wanrah ïa utei u khlur ïalehkai na ka bynta ban pynurlong ïa ki jingangnud ha kiwei pat ki lympung ïalehkai.
Ka jingmih noh u Mbappe na ka Paris Saint Germain ka la pynsah ha ka umdum ha kaba na ka liang u President kane ka klob u Nasser Al-Khelaifi u la kyntait ban siew ïa ka tulop kaba dangsah jong utei u khlur ïalehkai ka France.
Na ka daw ka jingbym hun halor ka jingthmu mih noh u Mbappe, u Khelaifi u la kyntait ban siew dep sha utei u rangïalehkai ïa ka tulop kaba 80 million Euros kaba kynthup lang ruh ïa kawei ka jingsiew sngew-bha (bonus). Ka PSG kam shym la siew ruh ïa ka tulop u Mbappe ha u Ïaïong bad ki khubor ki ïathuh ba kane mynta ka la sdang ban ïaid mukotduma.
“Ngi kwah ïa u ba un dang ïai sah, hynrei um lah ban mih da kaba laitluid. Ka dei ka jingïamynjur lang bad u la pynpaw paidbah halor kane ka bynta, te kumta ym lah ban ïatai nia. Ka long ka jingsngewkyndit kaba khraw halor ka jingthmu ka jong u kum uba laitluid,” la ong u AL-Khelaifi.
“Ka long ka jingduhnong kaba khraw namar u Kylian u long u rangïalehkai ba kynsai, jai jai bad ruh kam pyntlot noh ïa kane ka klob kaba heh na France. Haba nga ïohpdiang ïa kane ka khubor, nga sngewkyndit,” la bynrap u Al-Khelaifi.
