Dhaka, Jylliew:
Ka tnat Bangladesh Meteorological Department ha ka Sngi Nyngkong ka la pyntip ba u jumai ba 5.0 Magnitude u la pynkhynñiuh ia katto katne ki bynta jong katei ka ri kynthup ia ka nongbah Dhaka ha ka Sngi U Blei.
La ong ba utei u jumai u la khynñiuh ha ka por kumba 2:44 nohphai sngi bad ka tynrai ba khie utei jumai ka dei na Myanmar kumba 441 Km na Southeast of Agargaon Seismic Center hapoh jong ka nongbah Dhaka.
Ha katei ka sngi la ong ba ki bor pyniaid ka Dhaka kim shym la ioh jingtip eiei pat ban don kiba shah ktah ne mynsaw na utei u jumai ha katei ka Sngi U Blei katkum ka kaiphod ba la ioh lum da ka tnat iarap ha katei ka sngi.
Hynrei la ong ba ka Bangladesh ka dei ka ri kaba ju ioh mad khah-khah ia u jumai bad kumta ki nongshong shnong katei ka ri ruh kim da sngewpher shuh haba ïohsngew ia u jumai ba u wan.
