Rafah, Jylliew:
Ka United States ha kane ka por ka la pynpaw ia ka jingsngewkhia hadien ba ka la mih biang ka jing artatien ba ka thma hapdeng ka Israel bad ki Hamas ka long ka bym lah ban tehlakam namar wat hapdeng ka jing pyrshang shitom jong ki ri bapher ban wanrah ia ka jingiasuk hapdeng ka Israel bad ka Hamas bad ka long ruh hadien ba u President ka US- u Joe Biden u la ialeh shitom ban kyntu ia ka Israel bad ka Hamas ba ki dei ban ialeh ban poi sha ka lad jingiakren ïasuk ban pyntikna ia ka shongsuk- shongsaiñ ym tang ia ki paidbah nongshong shnong ka Gaza bad Israel hynrei wat ha kiwei ruh ki ri kiba ka jinglong- jingman kam shngaiñ shuh ha kine ki sngi namar jong ka thma Israel.
U Biden ha ka Sngi Thohdieng jong kane ka taiew ba la lah, u la pynpaw ia ka thong ‘Three-phase plan’ jong ka Israel ban pynkut noh ia ka thma ha Gaza, kumjuh ruh ban ioh pyllait lut noh ia kat kiba dang don ha ka kti ki lehnoh Hamas.
Wat la katta, la ong ba na ka liang ki Myntri Sorkar ka Israel pat ha ka Sngi Saitjaiñ ki la pynpaw ba ka Israel kam kwah da lei-lei ruh ban pynkut ne ban sangeh noh ia ka jingleit hiar thma sha Gaza bad ong ruh ba ka Israel kan iai bteng ia ka thma hapoh Gaza namar ka jingleh be-aiñ jong ki lehnoh Hamas ha ka 7 tarik u Risaw, kaba ka Israel hi kam lah shuh ban pdiang ne ban map noh khlem da ioh ban pyndep ia ka thong ba ka la buh naduh kaba sdang jong katei ka thma hapdeng jongka bad ka Hamas.
Ki lad pathai khubor ka Israel ki la buh jingkylli ruh halor ka jingkren jong u Biden haba iadei bad katei ka jingiakren ïasuk kumba u la pynbna ba ka Israel ka kwah ban wanrah noh ia ka jingiasuk bad ka Hamas, kynthup ruh ia ki jingiakren halor ka jingpyllait noh ia baroh kito kiba la shah rahbor ha ka Hamas bad kiba dang sahkut ha ka kti jongki tad haduh kine ki sngi.
Haba iadei bad kane, ki heh ka United States, Qatar bad ki jong ka Egypt ki la pyntip ba ki la dep khot ia ki heh ka Hamas bad ki jong ka Israel ban ia pyrkhat jylliew bad ban pynjem noh khnang ba kan lah ban poi noh sha ka jingiasuk bad kan long ruh kum shi bynta ban tehlakam ia ki jingma kiba ap ia ka pyrthei baroh kawei kiba la wan jia bad pynthud ia ki ri bapher naduh ba ka Israel ka la leit ban kput bad hiar thma ia ki lehnoh Hamas hapoh Gaza.
Kumjuh ruh u Lamphang ka White House National Security Council, u John Kirby ha ka Sngi U Blei u la ong ba ka US ka tip shai ba lada ka Hamas ka tyrwa ban iakren ïasuk shisha, ka Israel da lei-lei kan nym kyrngah bad ka kloi ban mynjur lada ka Hamas kan pyllait lut noh ia kito kiba ka la rahbor baroh shi katta.
Hynrei tad haduh ka Sngi Ba-ar ruh ym pat shym la iohi ia ki dak ka jingiasuk hapdeng ka Israel bad ki lehnoh Hamas namar ka Israel ka dang iai bteng hi ban leit hiar thma bad ther bom sha ki bynta khappud jong ka Gaza bad Israel wat haduh mynta mynne.
