Shillong, Jylliew 04
Hadien ba ka Shillong Sports Association (SSA) ka la ïoh ïa ki nongkitkam bathymmai, kane ka synjuk kan phaikhmat mynta na ka bynta ban pynurlong noh ïa kawei na ki jaka shong jong ki paidbah nongpeitkai (gallery) kaba la sahteng kaba don sha ki bynta jong ka Wahumkhrah.
U President bathymmai kane ka synjuk bad uba long ruh u MLA ka Mawkynrew Constituency, Bah Banteidor Lyngdoh, u la pynpaw ba ka bynta kaba kongsan ka long ïa ka madan ïalehkai bad khamtam ïa ka jaka shong ki paidbah kiba don ha ki bynta jong ka Wahumkhrah kaba dang sah khongrem haduh mynta.
Une u nongmihkhmat u la ïa don bynta teng bad kane ka synjuk ha ki por ba la leit. Hynrei, naduh u 2018 haduh u 2022 um shym la don bynta bad kane ka synjuk namar u la shimti kum u Myntri ka tnat ïalehkai jong ka Sorkar Jylla ha kito ki por.
“Nga khmih lynti ba lyngba ka jingïatrei lang jong baroh ki para dkhot ha kine ki 4 snem ngin sa lah ban pynurlong ïa katei ka gallery kaba dang sah khongreng haduh mynta bad kumjuh ïa ka madan ïalehkai kaba dang don hapdeng ki jingduna,” u la bynrap.
Ha kajuh ka por une u nongïalam bathymmai u la pynpaw ka jingai khublei ïa ki nongïalam barim naduh u President barim u Bah Eugeneson Lyngdoh bad kiwei ki dkhot kiba la lah ban pyntyllun ïa ki kam ki jam jong kane synjuk ha kine saw tylli ki snem ba la leit.
Lah ban pynkynmaw ba ka jingïoh ka SSA ban siang da u phlang plastik ha SSA Stadium 1st Ground, Polo ka dei ha ka por jong u Bah Banteidor uba bat ha kitei ki por kum u Myntri ka tnat ïalehkai. Kumta ha kane ka kynti kaba mynta ka la khmih lynti ba lyngba ka jingïoh ïa une u nongïalam ha ka kam saiñ pyrthei kan lah ban pynurlong ïa ki jingïarap na ka Sorkar Jylla na ka bynta ban pyndep ïa katei kawei na ki jaka shong ki paidbah nongpeitkai.
