Shillong, Jylliew 05
U Sunil Chhetri uba long u khlur ïalehkai phutbol ba paw jong ka ri, un pynkhreh ïa ka jingïalehkai bar ri kaba khatduh na ka bynta ka FIFA World Cup Qualifier pyrshah ïa ka Kuwait ha ka por 7 baje janmiet ha Salt Lake Stadium kaba ha Kolkata.
Ka jingjop ha kane ka jingïakhun ka ban long ha ka Sngi Palei kan long ka jingplie lad ban jam sha ka wat balai jong kane ka jingïaknieh rung sha ka wat kaba khatduh jong ka FIFA World Cup ka ban long ha u 2026 ha USA, Canada bad Mexico.
Dangshen na ka liang u Chhetri u la pynbna ba kane ka jingïakhun jong ka wat ba ar pyrshah ïa ka Kuwait kan dei ka jingïalehkai kaba khatduh na ka bynta ban pynkut noh ïa 19 tylli ki snem jong ka jingïalehkai ba ri. “Kane kam da dei eh na ka bynta jong nga bad ka jingïalehkai kaba khatduh. Ngam kwah ban shu ïai sah kumjuh. Ka thong ka jong ngi ka long ban khur ïa ka jingjop ha kane ka jingïakhun. Hooid kam long kaba suk, hynrei ngi la long ba la pynkhreh ha ryngkat ka jingdon lang ki paidbah nongkyrshan,” la pynpaw une u rangïalehkai shakhmat ba la 39 snem ka rta hashwa ban sdang kane ka jingïakhun kaba kham kongsan.
U Chhetri, uba la thmu ban shongthait noh na ka kam ïalehkai, u la pynpaw ïa ka jingkongsan jong kane ka jingïakhun. “Lada ngi khur jingjop lashai, ngin lah ban pynthikna ban jam sha kawei pat ka wat. Ki san tylli ki jingïalehkai ha la ïing bad shabar, ngan phong da ki jaiñ kiba itynnad bad ban sakhi ïa ka jingïalehkai shano shano ba ka leit ïalehkai. Man la ka sngi nga ju iakren ïa ki rangïalehkai shaphang kane ka jingangnud ka jong nga. Kane ka jingkilanmet kaba jrong ka long ba ngin ïoh ïa ka bor pyrkhat kaba kham pher bad ruh ban pynleit jingmut ïa ka jingïalehkai.”
Halor ka jingkylli lada un shongthait noh na kam ïalehkai, u Chhetri u la ong, “Watla ngan phong ia ïki jaiñ ba itynnad, hynrei ngan leit lang bad ka kynhun ban sakhi ïa ki rangïalehkai ha ka por ba ki ïalehkai. Nga la ïoh ban ïalehkai ha kine ki 19 tylli ki snem. Ngan leit kum uwei na ki nongkyrshan bad ban kyrshan lem ia ka kynhun shano shano ba ka leit.”
Ka jingïakhun pyrshah ïa ka Kuwait ka long kaba kham eh, khamtam hadien ba ka India ka la shah rem da 1-2 ha ka Afghanistan ha u Lber mynta u snem ha Guwahati.
Na ka liang u coach ka India u Igor Stimac u la pynpaw, “Ngi donkam ban sumar bha ïa ki rangïalehkai khnang ba kin lait na ki jingmynsaw. Ha kane ka jingïakhun ngi la duh noh ïa u Sandesh (Jhingan). Ki la lah ban ïalehkai bha ha ka jingïakhun pyrshah ïa ka Qatar. Hynrei nga sngewkmen halor ka jingpynkhreh. Ka dei ka jingïalehkai phutbol bad ngi dei ban lehkmen. Ka jingjop ka dei ha ki kti jong u nongbuh nongthaw.”
