Beirut, Jylliew:
Ha kane ka kynti la ong ba ha ka Sngi Nyngkong ka kynhun lehnoh Hezbollah ka la leit thombor da ki drone sha ki jaka treikam jong ka tnat shipai Israel ha Galilee. La ong ba kane ka long ka sien ba nyng-kong ia katei ka kynhun lehnoh ba kan kput ia ka Israel da kaba phah ia bun tylli ki drone kum shi bynta ban pynhiar kput halor ka jingleit thombor jong ka Israel sha Lebanon ha kine ki sngi ba la leit. La ong ruh ba ka Israel naduh ba ka la sdang ban leit hiar thma sha Gaza, ka kynhun lehnoh Hezbollah na Lebanon bad kumjuh ruh ki lehnoh Houthi na Yemen ki la pynthut ia ka Israel na ka por sha ka por namar ka jingkyrshan jong ki ia ka kynhun lehnoh Hamas kaba synshar ia ka nongbah Gaza mynta da ki phew snem.
Tad haduh ka step Sngi Ba-ar ba la pyllait ia kane ka khubor, na ka liang ka tnat shipai ka Israel pat kam shym la pynphai ktien na kren eiei halor katei ka jingjia ba la shim jingkitkhlieh da katei ka kynhun lehnoh Hezbollah jong ka Lebanon.
Hynrei, ki shipai ka Israel ki la pyntip ba ha katei ka Sngi Nyngkong ki la ioh siat iap ia u Ali Hussein Sabra, uba long u dkhot ba paw khmat bha jong ka kynhun lehnoh Hezbollah.
