Shillong, Jylliew 05
Ka Bouncer Association of Meghalaya (BAM) ha ka jingkynjoh ïa u mawmer ba 20, ka la rakhe ïa ka World Environment Day bad Global Running Day ha ryngkat ka jingïatrei lang bad ka The Acts da kaba pynlong ïa ka jingmareh marathon 7 kilometre bad pynkut pat da kaba thung ïa ki tynrai dieng kiba bun jait ha ka Sngi Balang.
Ïa kane la marathon la sdang na Lad Ïewsier, Mawtnum bad la pynkut ha Nepali Secondary School kaba ha Nongpoh kaba la wan shim bynta palat 300 ngut ki nongmareh kata naduh ki khynnah rit, ki thei bad rang samla, haduh kiba la kham rangbah.
Haba ïadei bad ki nongjop ha ka Interschool Junior jong ki shynrang la rah da u Alvin Thapa, ba-ar u Fairlando bad balai u Nickhil Makri. Ha ka liang ki kynthei la jop da ka Rinalis Ingti, ba-ar ka Julina Bongrung bad ïa ka kyrdan balai la jop da ka Banysha Lyngdoh.
Ha ka Interschool Senior jong ki kynthei la jop da ka Antonia Lyngdoh, ba-ar ka Anisha Lyngdoh Nongbri bad balai ka Risakmen. Katba ha ka liang ki shynrang la jop da u Lapynkhraw Thabah, ba-ar u Vickyshan Sohshang bad ïa ka kyrdan balai la jop da u Elberth Thongni.
Ha ka liang ka Open Category jong ki shynrang la jop da u Manas Bongrung, ba-ar u Skhemlang Suba bad balai u Eman Bongrung. Ha ka liang ki kynthei la jop da ka Sildaris Makri, ba-ar ka Filinza Hansepi bad balai ka Dari Iangi Marweiñ.
Ïa ka nam nongjop ha ka Veteran Category jong ki shynrang la jop da u Pratap Das, ba-ar u Dr. Vinay Kumar Sharma bad balai u James Tamang. Ha ka liang ki kynthei la jop da ka kong Snora Rani, ba-ar ka Shyamali Chakraborty bad ïa ka kyrdan balai la jop da ka kong Please Me Rani.
Ïa ka nam Most Eldest Athlete ïohpdiang da ka Kong Please Me Rani bad ïa ka nam Most Youngest Athlete la ioh da u Iïasharon Makdoh.
Ha kane ka sngi la don ryngkat lang u Bah Bathok Nongmalieh, uba long u Rangbah Shnong jong ka Shnong Mawtnum Dorbar.
Kat kum ka kyrwoh ba la pyllait da u President ka BAM u Bah Junestar Kharbuli, ka la pynpaw ka jingsngewnguh ka leit kyrpang ruh sha ka skul Nepali Secondary School ka ba la ai jaka ban pynkut ïa kane ka program.
