Shillong, Jylliew 05
U Rohit Sharma u la lah ban khyrwit ïa ka shiteng spah run na ka bynta ban pynlong ïa ka India ban pynliem noh ïa ka Ireland da 8 wiket na ka bynta ban khur ïa ka jingjop kaba nyngkong ha ka ICC Men’s T20 World Cup kaba la long ha ka sngi Balang ha Nassau County International Cricket Sta-dium kaba ha New York.
Une u kapten ka kynhun ïalehkai ka ri, u dei balai napdeng ki nongïalehkai ka pyrthei ban kynjoh sha 4000 run ha ki lympung ïalehkai T20. Kumta une u rangïalehkai u la tied 52 run na ki 37 bol ha shwa ba un shongthait na ka mynsaw na ka bynta ban pynlong ïa ka India ban kynjoh sha ka thong ha ka Group-A hadien ba ka Ireland ka la buh ïa ka thong da kaba kamai tang 96 run. Katba u Rishabh Pant (not out) u la lah ban tied 36 run na ki 26 bol.
Wat la ka India ka la jop ïa ka kynting pisa, hynrei ka la jied ban kawang bol nyngkong. Te ka Ireland kaba la shimti ban tied nyngkong, ka la shah pynkhyllem baroh ki nongtied tang ha ki 16 over bad ban kamai tang 96 run.
Kane ka la wan lyngba ka jingïalehkai bha ki nongbol kiba kynthup ïa u Hardik Pandya uba la khur 3 wiket, katba u Archdeep Singh bad u Jasprit Bumrah ki la shim mar 2 wiket. Ïa ki shi wiket la shim da u Mohammed Siraj bad u Axar Patel.
U Gareth Delany u la long u nongtied uba la ïoh bun eh da kaba kamai 26 run na ki 14 bol. Katba kiwei kiba la bynrap lang ki long u Joshua Little uba la tied 14 run na ki 13 bol bad u Curtis Champher uba la tied 12 run na ki 8 bol.
Katei ka jingmynsaw u Sharma ka lah ban buh jingeh ïa ka India na ka bynta ka jingïakhun ka ban ar pyrshah ïa ka Pakistan ka ban long ha ka sngi U Blei.
