Shillong, Jylliew 05
Ka Shillong Lajong FC ka la soi ïa lai ngut ki ‘rang ïalehkai na ka bynta ban mihkhmat ïa kane ka klob ha ka aïom ïalehkai Shillong Premier League 2024 hadien ba ki la wan sha ka miej jong ka Shillong Sports Association (SSA) na ka bynta ban soi ïa ka jingkyntiap klob (inter club transfer) ha ka Sngi Balang.
Kat kum ka jingpyllait da katei ka synjuk la ong ba u Kynshai Lhuid bad u Ronney Willson Kharbudon, kiba dei na Langsning FC bad u Shaitborlang Kharkrang na Sawmer SC ki la pyndep ïa kane ka jingsoi soskular.
Lah ban kdew ba kane ka jingpynkhlaiñ ka Lajong ha kane ka kynti kaba mynta ka la wan hadien ba ka la shah rem noh ha ka Rangdajied United FC da 1-0 kol ha ka semi final jong ka SPL 2023 ha ka 7 tarik u Jymmang mynta u snem.
Na ka liang ka synjuk ialehkai jong ka SSA ka la pynpaw ha kane ka ïew kyntiap klob jong ki ar sngi, ki la don haduh 46 ngut ki rangïalehkai kiba la soi ïa ka jingsoi soskular na ka bynta ban ïalehkai noh na kiwei pat ki kynhun ïalehkai naduh ka Shillong Premier League, First, Second, Third bad Fourth Division.
Kane ka ‘inter club transfer’ kan bteng manla ka sngi naduh ka por 3 haduh 5 baje janmiet bad yn pynkut ha ka sngi Saitjaiñ bad la khmih lynti ban kin nangbun ki ban wan poi hapoh ka miej jong ka SSA.
Hadien ba la kut kane ka iew kyntiap klob, na ka liang ka SSA kan sa sdang noh ïa ka lympung ïalehkai Fourth Division mynta u bnai.
