Bogota, Jylliew:
Uwei u nong America ha Sngi Ba-ar u la shah rai set patok haduh 42 snem hapoh Bogota hadien ka jingdon kti ban pyniap ia ka DJ na Colombia. Katei ka jingjia ka la wanrah ia ka jingpyrshah jur na ki seng pyrshah jong katei ka ri.
U John Nelson Poulos u la shah kem noh ha u Kyllalyngkot 2023 napoh Panama katba u dang ialeh ban phet krad na ka kti ki bor pyniaid bad ki pulit jong ka Colombia hadien ba u la pyniap ia katei ka samla 23 snem ka rta- ka Valentina Trespalacios, kaba u dang shu iajuh-iajan dang hapoh shi snem.
Ki pulit ki iathuh ba utei u briew u la shoh bad ksih ia ka halor ka jingtharai sniew bad jingbishni ia ka jingiadei jong ka bad kiwei pat kiba um sngewtynnad.
Katkum ka video ba la iohi lyngba jong ki CCTV camera kiba la pyndait ha katei ka jaka, la iohi ia u Poulos uba mih na ka jaka sah jong u ha ryngkat ka kali rah tiar kaba u tan ia kawei ka synduk ‘case’ kaba heh, ha kaba la shem ia ka met jong ka Trespalacios napoh jong katei ka synduk.
Ia ka met jong katei ka samla, la shem pat na ka jaka bret ñiut hadien katei ka jingjia.
La ong ba ka Colombian Femicide Observatory ka la iathuh ba ki la don kumba 612 tylli ki jingjia pyniap hapoh katei ka ri hapoh jong utei u snem. Hynrei la ong ba ka sorkar ka la shim khia bad ioh ban buh jingkheiñ tang kumba 100 tylli ki jingjia.
Namar la ong ruh ba kitei ki jingjia thombor bad ki jing pyniap klep ki la sdang jur bad kynrei bha hapoh Colombia naduh mu snem 2015 shaneng.
