Nongstoiñ, Jylliew 06
Hadien ba ka la mih ka jingbym hun jong ki khynnah ïalehkai bad ki skul halor ka jingpynkylla ïa ka rukom pynïaid ïa ka lympung ïalehkai District Level Subroto Cup Foot-ball Tournament 2024 na ka league sha ka Knockout system, ka Federation of Khasi Jaiñtia & Garo People (FKJGP) West Khasi Hills ka la pynpaw jingbynñiaw bad pyrshah jur halor kane ka jingthmu.
U Bah Anthony Umiong, Sports Secretary ka FKJGP West Khasi Hills ha ka Sngi Palei u la leit ban ai da ka jingthoh ha ka shlem treikam ka District Sports Officer (DSO) bad buh ka jingkyrpad ban pynlong beit da ka league system.
Shuh shuh ki nongkitkam ka FKJGP, ki la ïathuh ruh ba ha katei ka jingleit ïakynduh ïa ka DSO ka la pan ruh ïa ka jingpynshai ba balei la shu pynkylla kyndit. Hynrei na ka liang DSO ka la ïathuh ba la khim palat ka por namar ki hap ban phah noh kloi ïa ka kynhun ka ban rah ïa ka nam lahduh ban mih khmat ïa ka district sha ka State Level Subroto Cup kaba la thmu ban long ha ka nongbah Shillong.
Ym tang katta ki la ïathuh ruh ba ka DSO ka la kular ruh hakhmat ka seng ban lum kyrkieh ïa ka tournament committee ban pyrkhat halor ka jingkyrpad jong ka seng, hynrei na ka liang jong ka seng ka dap da ka jingbynñiaw ban tip ba na ka liang ka DSO ka la phah da ka jingthoh ba ym lah shuh ban pynkylla ïa kaba la rai.
Namar kata, ka FKJGP ka la pynpaw ïa ka jingbynñiaw halor kane namar kane kan pynlong ïa kane ka lympung ïalehkai ba kan nanghiar arsut hapoh ka thaiñ west Khasi Hills namar ba lada ïalehkai da ka league system, u khynnah lane ka khynnah kin lah ban ïoh pyni ïa ki sap ba ki don. Hynrei lada pynlong da ka knock out system ka mut ki khynnah kim pat ïoh lad bha ban pyni ïa la ki sap jong ki bad lehse da ki rem noh ka mut ka sap ba ki don ka la shu kut noh.
Ka FKJGP ka la pynpaw ruh ba ïa kaba mynta u snem lehse ym lah ban leh eiei shuh, hynrei ka seng ka dawa ba ha ki snem ki ban dang wan ki dei ban pynïalehkai kumba ju long kata da ka league system.
“Kane ka dei ka jingbym shim khia jong ka tnad ïalehkai kaba imat ka lah shu kheiñ sting ban shu leh tangdep kumta ka seng ka dawa bad kyntu jur ba kim dei ban kheiñ sting, hynrei ka dei ban shim khia khnang ba ka lawei jong ki khynnah ïalehkai kan ym sepei,” la bynrap ka FKJGP.
Ha kaba ïadei bad ka jingjurip rta (screening), ka seng kyntu bad ai jingmut la kumno kumno ki skul ki dei ban ïoh kham bun ki khynnah ïalehkai ym shuh kumba long ha ki snem ba la dep namar bun ki skul ïoh tang 8/9 ngut ki khynnah, hynrei ka bha ban phah wanrah tam ïa ki khynnah ïalehkai ha ka jingjurip rta khnang ba kin ïohlad.
Shuh shuh ki la ong ba ka jingjurip rta ruh kan ym dei shuh ha ka por kaba lah miet kumba long ha ki snem ba la lah bd lada ym lah ban pyndep ïa ka por kaba la buh, ka bha ban pynjlan namar ki khynnah ki dei ban poi ha ka por kaba biang sha la ki jong ki ïing ki sem.
