Shillong, Jylliew 06
“U Lewis Morgan un wanrah ka jingkylla ïa ka kynhun ïalehkai ka Scotland “, la pynpaw u coach u Steve Clarke hadien ba utei u rangïalehkai shakhmat u la shah khot ha kane ka kynhun phra sngi hashwa ban sdang ka jingïalehkai kaba nyngkong jong ka Euro 2024 pyrshah ïa ka Germany.
Une u rangïalehkai ba dang 27 snem ka rta jong ka New York Red Bulls u la ïasoh lang ryngkat u rangïalehkai U-21 jong ka Scotland bad uba long u rangïalehkai shakhmat ka Bristol City u Tommy Conway sha kane ka kynhun jong u Clarke hadien ba u rangïalehkai shakhmat u Lyndon Dykes bad u rangïalehkai shapdeng u Ben Doak ki la ngat ha ki jingmynsaw.
Da ka jingshah kynthup lang u Morgan, kane ka kynhun ka la don haduh 28 ngut ki rangïalehkai bad hadien yn sa pynduna sa tang 26 ngut hashwa ba kin leit sha Germany.
Ka Scotland kan ïakhun pyrshah ïa ka Finland ha Hampden ha ka sngi Thohdieng na ka bynta ka jingkilanmet ban pynkhreh ïa ka Euro.
U Morgan uba long u rangïalehkai barim ka Celtic, Inter Miami, St Mirren bad Sunderland u la shah jied ar sien ha katei ka kynhun jong u Clarke, uba la mih bujli ha ka jaka u Alex McLeish ha u 2018.
Une u rangïalehkai shakhmat u la thep 66 kol ha ki 284 sien kiba u la ïoh ïalehkai na ki klob, kynthup ia 26 kol naduh ba u la pynïasoh sha ka Bulls ha u 2022.
“Ngi phaikhmat beit tang sha ki rangïalehkai. U Lewis u la ïoh ban ïalehkai kumba katto katto katne por ha ka MLS. U la wanrah ka jingkylla, ha kaba u lah ban ïalehkai ha ka bynta kaba shakhmat bad ruh kum u rangthep kol,” la bynrap u Clarke.
“Ka long ka jingduh kaba khraw ïa ki rangïalehkai kiba ngi la duh, hynrei ngi la ïoh pat da kiwei kiba kynsai. Kin long ki rangïalehkai kiba lah ban ïalehkai na ka bynta ka kynhun.”
U Aaron Hickey, Nathan Patterson bad u Lewis Ferguson kim shym la shah jied na ka daw ka jingmynsaw.
U Scott McTominay u dang shu sdang ban kilanmet ha ka sngi Palei hadien ba u la lah ban pynurlong ïa ka Manchester United ban khur ïa ka jingjop ha ka FA Cup bad u rangïalehkai shapdeng u Stuart Armstrong um pat shym la ïasoh sha kane ka kynhun.
“Kan long ka jingïalehkai kaba kham eh watla ngin hap ban ïakynduh ïa ki jingeh, hynrei ngin hap ban pynleit jingmut ha ka ban ïalehkai bha,” la ong u Clarke.
Katei ka jingïakhun pyrshah ïa ka Germany kan long ha ka 15 tarik mynta u bnai. Kiwei pat ki kynhun kiba la don ha ka Group-A ki long ka Hungary bad ka Scotland.
