Haba la dep ka jingïathoh shongkurim u shynrang u dei ban leit sah ha ïing ka kynthei ha ka dustur Khasi. Ha ri Khasi jongngi la shitom ban pynneh pynsah ïa ka dustur ka riti u barim bajah. Wat ka District Council kaba la ïoh bor ban peit bad sumar ban pynneh pynsah ïa ka riti ka dustur ruh ka shem jingeh. Kane ka dei ka jingkylla jong ka por kumba kylla ka aïom. Na ka bynta ban wanrah ïa ka jingbha ym dei ban shu bud sah ïa ka riti ka dustur ki bym ïa hap kiba dei ban pynkylla noh namar kim ïa dei shuh bad ka rukom im ki briew mynta. Hooid ki don ki dustur kiba bha kiba ngi dei ban pynneh pynsah ïa ki.
Ki don ki dustur hiar pateng kim dei ban khanglad ïa ka jingkylla na ka bynta ka jingbha lang ïa baroh. Ka dustur kheiñ jait kheiñ kur dei ban bishar bniah la ka dang ïahap ne em bad kane ka juk ba mynta. Ka dustur bat khyndew bat shyiap ruh dei ban da thew pyrla bha la ka dang ïa hap bad kane ka juk mynta. Namar ha ka juk u barim ïa ka khyndew ka shyiap ki bynshet beit ha ka khun khadduh ka bym ïa hap shuh bad ka jingkylla jong ka por. Ha ka dustur Khasi ka kheiñ kur kheiñ jait ruh ki shim ïa ka jait na ka kmie ne kynthei. La dei ka por ban peit bniah ïa kine ki dustur ki riti bala buh pateng u longshuwa manshuwa. Kawei pat ka dustur shongkha shongman ka la kylla khongpong na ka daw ba ngim bud shuh ne bat ïa ka tynrai la jong.
Namar mynta bun kiba la ioh noh ïa ki dustur la jong bad bud la ka dustur jingïalam ka niam Khristan. Ha ka jingshisha ka jingkyntiew kurim ka kynthei ka dei ban leit rung shuwa ha ïingmane bad u shynrang un sa wan bud nadien. Katba mynta pat u shynrang u ïalam shuwa ban rung hapoh ïingmane ka kynthei ka wan nadien. Ha ka dustur Khasi ka kynthei ka dei ban leit rung shuwa hapoh ïingmane bad u shynrang un sa bud nadien. Ha ka riam ka beit ruh ym dei ban phong ne riam da kaba bud ïa ka rukom ia u phareng wat la pynïathoh Khristan makna. U Khasi u dei ban riam da ka ïathoh shong-kurim la jong ne ka dhara ne muka, ym da ka jain lieh hapoh ka jingkyntiew kurim la hapoh ïingmane ne hapoh ïing ruh. Ha ka jingkhawai shongkurim ha Galilaia ha ka por u Jisu ki jaitbynriew Jiw ha kat ka por ki riam ki beit kumno haba ki pynïathoh shongkurim ïa ki khun ? Ne ki shu bud ïa ka riam ka beit u phareng bad phong da ka bir ne jaiñ lieh kumba long mynta. Katba mynta kim bud shuh ïa la ka jong ka dustur ki ïa bud tynneng ïa ka rukom leh u phareng ha ka jingkyntiew kurim ha ka Bri u Hynñiewtrep. Dei na kane sngewdei ban pynpaw ba baroh nangmih sngi nangjah ka dustur ka riti u Khasi.
C. B. Iawphniaw
