Shillong, Jylliew 06
U Sunil Chhetri u la pynkut noh ïa ka kam ïalehkai hadien ba ka India ka la ïakhaid khlem don ba thep kol pyrshah ïa ka Kuwait ha ka lympung ïalehkai FIFA World Cup 2026 (qualifier) ha ka Sngi Palei ha Kolkata.
Ha kane jingïalehkai baroh ar kynhun ki la ïoh ïa ki kabu kiba biang, hynrei kim shym la lah ban thep haduh kaba kut ka jingïalehkai. Kumta ka India ka la ïai sah ha ka kyrdan ba-ar bad ka donkam ban jop pyrshah ïa ka Qatar ha ka jingïakhun ka ban long ha ka 11 tarik na ka bynta ban pynthikna ban ïoh rung sha kawei pat ka wat bad ruh ban ïoh rung sha ka FIFA World Cup ka ban long ha u 2026 ha USA, Canada bad Mexico.
Kane ka long ka jingïalehkai kaba khatduh na ka bynta u Chhetri uba la 39 snem ka rta. U la long u rangïalehkai uba kynsai na ka bynta ban pynlong ïa ka India ban rah nam jop ha ka Nehru Cup ha u 2007, 2009 bad 2012, bad kane ka la pynsah kynmaw halor ka jingnoh synñiang ka jong u.
U Chhetri u la lah ban pynurlong ruh ïa ka India ban rah jingjop haduh saw sien ha ka SAFF Championships ha u 2011, 2015, 2021 bad 2023. Nangta, u la lah ruh ban pynurlong ïa ka India ban rah nam jop ha ka AFC Challenge Cup 2008bad pynlong ïa ka India ban ïoh rung ha ka sien nyngkong sha ka AFC Asian Cup ha ki 27 snem.
Ha kine ki 19 tylli ki snem ha ka kam ïalehkai, une u khlur ïalehkai uba la ïohpdiang ïa ka khusnam Arjuna u la ïoh ban thep 94 kol na 150 sien ki jingïalehkai bar ri. U la long uba saw napdeng ki khlur ïalehkai ka pyrthei kata hadien u Cristiano Ronaldo, u rangïalehkai ba la shongthait jong ka Iran u Ali Daei bad u Lionel Messi ha ka jingdon bun kol.
