Shillong, Jylliew 06
U Antonio Conte u la pynthikna ha ka sngi Balang ban shimti kum u coach bathymmai ka Napoli bad basan ban shimti kum u manager tang hapoh shi snem na ka bynta katei ka lahduh jong ka Serie A.
Ka Napoli ka la pynbna ba kane ka jingsoi ïa u Conte ka long na ka bynta ka kontrak kaba lai snem. Katkum ki khubor la ong ba utei u coach barim ka Italy un ïoh ïa ka jingsiew kaba 6 million euros ($6.5 million) nalor kiwei pat ki jingsiew. “Ka Napoli ka long ka klob kaba donkam eh ban ïalehkai bha ha ki lympung ïalehkai bar ri. Te kumta nga sngewkmen eh ban pynïasoh sha kane ka klob,” la ong u Conte ha ka kyrwoh.
“Kawei kaba nga lah ban kular ka long ba ngan ïaleh katba lah ban kyntiew ïa kane ka kynhun bad kumjuh ïa ka klob hi baroh kawei. Ngan ïaleh ban pynurlong ïa kaei kaba la pynkhamti ha nga.”
U Conte, u la lah ban pynurlong ban rah nam jop ha England bad uba la bat haduh saw sien ïa ka kynhun ïalehkai jong ka Italy, um shym la pynïasoh sha kano kano ka klob naduh ba u la mih noh na ka Tottenham naduh u Lber jong u snem 2023.
Kane ka jingmih noh ka jong u ha ka por kaba lyngkot ka la wan hadien ba u la kynthoh pyrshah ïa ki rangïalehkai bar kumjuh ïa ki trai jong ka klob. Kane kam dei ka sien kaba nyngkong ia u Conte ba un kynthoh pyrshah pyrshah ki trai jong ki klob bad kane ka la jia ïa kiwei pat ki klob.
Kumba ka paw ka Napoli ka la rah ïa ka nam lahduh kaba nyngkong eh ha ka Serie A naduh ki laiphew snem mynshwa. Naduh ki por ba shimti u Diego Maradona bad haduh ka jingïalam u Luciano Spalletti.
Hynrei u Spalletti u la mih noh hadien ba u la pynpaw ba u donkam ban saiñ dur ïa kane ka kynhun haduh shi snem. Te kumta u la shimti noh ban la long u coach ka Italy hadien ka jingïehnoh u Roberto Mancini. Te kumta ka Napoli ka la ïakynduh jingeh na ka bynta ban ïoh bat biang ïa ka nam lahduh ha katei ka lympung.
Watla u Rudi Garcia, Walter Mazzarri bad u Francesco Calzona ki la wan ban shimti kum u coach, hynrei ka Napoli ka la nangsniew dur ha kaba ka la wan ha ka kyrdan ba shiphew bad ka la ruh ruh ïa ka lad ban ïoh rung ha ki lympung ïalehkai ha Europe.
“Nga sngewkmen eh ba u Antonio Conte un long u coach uba thymmai,” la pynpaw u President u Aurelio De Laurentiis.
“U Antonio u long u coach uba kynsai bad u nongïalam,te kumta nga la lah ban pynkohnguh ba un shimti na ka bynta ban pynkhlaiñ ïa ka kynhun na ka bynta ban kynjoh sha ka thong hadien ba kane ka klob ka la ju wan ha ki kyrdan ba kham shakhmat ha ka lympung ïalehkai kaba ha Italy.”
U Conte u la shimti khatduh ban pynïaid ia ki klob ha Italy ka dei bad ka Inter Milan, ha kaba u la mih noh ha u 2021, hadien ba kane ka klob ban rah ïa ka nam kaba nyngkong eh ha ka Serie A title ha ki 11 snem kiba u la shimti.
Kumta u Conte uba la 54 snem ka rta u la khmih lynti ban pynlong ïa ka Napoli kum ka klob kaba lai ban khur ïa ka nam lahduh ha ka Serie A hadien ki lai tylli ki snem kiba u la shimti ïa ka Juventus.
