Shillong, Jylliew 07
Kum shi bynta ban pynproh ïa ka jabieng ki khynnah, ka Mawphlang Secondary School ha ryngkat ka jingïatrei lang bad ka State Council of Science Technology and Environment, ha ka sngi Thohdieng ka la pynlong ïa ka lympung ïalehkai chess ba la tip kum ka Inter School Chess Tournament 2024 hapoh jong katei ka skul kaba don ha Mawphlang.
Ha kane ka lympung ïalehkai kaba ar sngi la wan ïashim bynta da 6 tylli ki skul kiba don ha katei ka thaiñ kiba kynthup ïa ka St Paul Higher Secondary School, Multi Purpose High Secondary School,Rev. Thomas Jerman Jones Presbyterian School, Seng Khasi Secondary School, Mount Hermon Higher Secondary School bad ka Mawphlang Secondary school.
Ka jingpynlong ïa kane ka lympung ïalehkai ka long shi bynta ban kyntiew ïa ki khynnah ha kane ka jingïalehkai bad ruh ban pynïar ha ka bor pyrkhat pyrdaiñ ka jong ki. Ïa kane ka lympung ka ban neh ar sngi lynter la wan ban plie da u MLA ka thaiñ u Bah Matthew Beyondstar Kurbah ha kaba la ïadon lang ki nonghikai jong kane ka skul lem bad ki khynnah skul.
