Shillong, Jylliew 07
Ka Palestine ka la lah ban thaw ïa ka khana na ka bynta ban jam sha ka wat kaba lai jong ka FIFA World Cup qualifiers ha ka sien kaba nyngkong eh hadien ba ïakhaid khlem don ba thep kol pyrshah ïa ka Lebanon ha ka sngi Palei ha Doha.
Wat hapdeng ka thma ha Gaza, katei ka kynhun ïalehkai jong ka Palestine ka la lah ban pynpaw ïa ka jinglah jong ka ha ka jingïalehkai phutbol mynta u snem na ka bynta ban ïoh rung pre-quarter final ha ka sien kaba nyngkong eh ha ka Asian Cup.
Ha ka sngi Palei, ka Palestine kaba la don ha ka Group-I ka la kamai 7 point, ka la donkam tang ban shu ïakhaid na ka bynta ban jam sha kawei pat ka wat jingïakhun. Kumta ka la lah ban pynurlong ban kynjoh sha ka thong hadien ba ka Lebanon ka la ïalehkai sniew ha kaba ki rangïaleh -kai ki la ïohpdiang haduh hynñiew tylli ki yellow card.
Lah ban kdew ba kane ka long ka sien ba saw ïa ka Palestine ban ïoh rung sha ka wat khatduh jong ka AFC Asian Cup ka ban pynlong da ka Saudi Arabia ha u 2027.
Kane ka kynhun jong u Makram Daboub kan pynkhreh ïa ka jingïakhun ka ban wan pyrshah ïa ka Australia ha ka 11 tarik mynta u bnai. Ka Australia ka dei ka kynhun kaba la jop 2-0 kol ïa ka Bangladesh ha Dhaka.
U rangïalehkai ka Bayern Munich u Nestory Irankunda, uba la kha hapoh ka ktem jong ki poiwir (refugee camp) ha Tanzania hadien ba ki kmie ki kpa jong u ki la don ha ka jingeh ha Burundi, u la ïoh ïa ka lad ha ka sien kaba nyngkong eh ban mihkhmat na ka bynta ka Australia.
Utei u rangïalehkai ba dang 18 snem ka rta u la ïoh ban thep kol nyngkong ha ka 29 minit hadien ka jingïarap pynbuh bol da u Ajdin Hrustic.
Kham hashwa u rang-ïalehkai ka PSG u Lee Kang-in lem bad u rangïa -lehkai ka Tottenham u Son Heung-min ki la ïoh ban thep kol na ka bynta ka South Korea kaba la jop ïa ka Singapore da 7-0 kol.
