Shillong, Jylliew 07
Ka jingïaid lynti ka kynhun ïalehkai ka ri India ka la poi sha kaba kut ha ka Indonesia Open Super 1000 tournament ha kaba u rangïalehkai badminton u Lakshya Sen u la shah rem noh ha ka quarter final jong ka men’s singles ha ka sngi Thohdieng.
U Sen, uba don ha ka kyrdan ba 14 ha ka pyrthei, u la ïakhun tyngeh hashwa ba un shah rem noh da 22-24 18-21 ha u rangïalehkai na Denmark uba bat ïa ka kyrdan ba san ha ka pyrthei u Anders Antonsen ha ka jingïakhun kaba la nem shi kynta bad shi minit.
Te kumta mynta u Antonsen u la tam da 3-2 pyrshah ïa utei u rangïalehkai ka ri. Watla kine baroh ar ngut ki la ïalehkai bha, hynrei u Antonsen u la tam da 4-0 hashwa ba u Sen un ïakhun tyngeh na ka bynta ban pynïakhaid da 5-5 bad hadien da 15-11. Hynrei u Dane um shym la kynran dien ha kaba u la iakhun tyngeh na ka bynta ban ïakhaid da 16-16.
Kine baroh ar ngut ki la ïai bteng ban ïakhun tyngeh hadien ki 22 point bad utei u rangïalehkai ka ri India u la mat ïa ka jingshah rem.
Lyngba kane ka jingjop u Antonsen un pynkhreh ban ïakhun pyrshah ïa u Kunlavut Vitidsarn uba na Thailand ha ka semi final.
