Shillong, Jylliew 07
Ka shlem treikam u District Sports Officer (DSO) East Khasi Hill kan sdang noh ïa ka lympung ïalehkai phutbol ba la tip kum ka District Level Inter School Subroto Cup Football Tournament 2024 naduh 10 tarik u Jylliew ha kane ka nongbah.
Ha kane ka lympung ïalehkai yn wan shim bynta da ki skul napoh kane ka district ha ki kyrdan ïalehkai Under-15 jong ki shynrang, katba ka Under-17 ha ka liang ki kynthei bad shynrang. Ïa kane ka lympung yn pynlong ha madan Third Ground jong ka MFA ha Polo bad ha Madan Heh Mini Stadium kaba ha Mawlai Phudmuri.
Ki kynhun ki ban ïashim bynta ha ka U-15 ki don 12 tylli ha kaba yn pynïalehkai ha Madan Heh, katba ha ka U-17 ki kynthei ki don 5 tylli bad U-17 ki shynrang ki don 14 tylli ha kaba yn pynïakhun ha Third Ground, Polo.
Ïa kane kajuh ka lympung yn pynlong da ka shlem treikam u DSO Ri Bhoi District ka ban sdang naduh ka 11 tarik mynta u bnai ha madan Nongjri bad Umran Niangbyrnia kia ha Ri Bhoi Distict.
Ki kynhun ki ban rah ïa ka nam lahduh ha kitei ki kyrdan ïalehkai kin ïoh ïa ka lad ban mihkhmat sha ka State Level Subroto Cup Football Tournament 2024 ka ban long ha kane ka nongbah.
