Shillong, Jylliew 07
Ka ‘thei siat suloi jong ka ri ka Sift Kaur Samra ka la khur ïa ka takma rnong ha ka ISSF World Cup bad ka la duna da ka said ban khur ïa ka takma rupa ha ka 50m rifle ha ka sngi Thohdieng ha Munich.
Te kumta ka India ka la pynkut da kaba khur ar tylli ki takma kata hadien ba u Sarabjot Singh u la khur ïa ka takma ksiar ha ka 10m air pistol jong ki shynrang ha ka sngi Palei.
Ha katei ka jingïakop kaba khatduh, ka Sift ka la lah ban tiat 452.9 bad ka la duh noh ïa ka takma rupa da 0.1 ha ka nongïalehkai kaba na China ka Han Jiayu, kaba long ka lahduh (air rifle) ha ka liang ki kynthei.
Ka khlur ïalehkai na Great Britain kaba la bat ïa ka kyrdan ba nyngkong ha ka pyrthei, ka Seonaid Mcintosh ka la khur ïa ka takma ksiar da kaba kamai 466.7.
Kane ka jingiakhun final jong ka 3P ha ka liang ki kynthei ka la don ka jingslem khyndiat na ka daw ka la don ka jingthud ha ka liang ki kor ki bor (electronic target) ha ka por ba nongialehkai Olympic na Denmark ka Ibsen Rekke Maeng ka dangthmu ban siat.
Ha ka 3P final jong ki shynrang, u rangialehkai ka ri u Aishwary Tomar u la iakynduh jingeh ha kaba sdang, hynrei u la hiar shaduh ka kyrdan ba phra bad ban kamai 408.9 hadien uba la siat 40 sien.
U rangialehkai na Norway u Ole Martin Halvorsen (464.3) u la khur ia ka jingjop, hadien u la tam da 0.2 ha ka jingiakhun final, kaba u Hegg u la khur ia ka takma rnong bad kamai 449.9.
