Naduh ki por mynshuwa ka la don kane ka rukom ai jait sha u Kpa ruh ha ngi ki Khasi. Kane ka long ka jingshem jong nga ha ki longïing longsem bad khamtam kiba trei kam sorkar ruh. Bun kiba trei kam sorkar kiba la khlad noh bad kiba dang im ruh ki don beit kiba ai jait sha u kpa naduh mynshuwa. Ym tang katta kiba ai jait kpa, hynrei kiba ai jait lang bad jait kmie bad jait kpa ruh ki don byllai ha ngi ki Khasi. Ki don wat hapoh kajuh ka ïing ka sem kum ki khun ki kti bad shipara trai ki don kiba ai jait kpa ki don kiba ai jait kmie. Te kumno phin pynduh noh ïa kiba ai jait sha u kpa ? Ki don bun ruh kiba la ioh schedule Tribe na kiba ai jait kpa mynshuwa. Hynrei ki khlem kylli bad ai daw bad pynduh noh kum mynta. Te kane kam dei ka jingbym ler ki nongmihkhmat ha ka district Council kiba shu peit shiliang tang ïa kata ka dustur shim jait kmie. Ha ka jingshisha dei ban pdiang ïa baroh arliang kiba kwah ai jait kpa bad kumjuh kiba ai jait kmie. Lada leh kumne te ka dei shisha kata ka jaitbynriew kaba kyrpang hapoh pyrthei. Kumno mynta phin pynduh Schedule Tribe ïa kiba ai jait kpa. Namar kiba ai jait kpa ruh ki dei ki Khasi paka ym tang ki khun shipiah ne ki khun ba ioh kpa ki bym dei Khasi. Ki bor ba dei peit ïa ka dustur ka riti ki dei ban da pyrkhat sani bniah bha shuwa ba kin rai pynduh noh ïa ka rukom ai jait kpa ioh ka nang pynpait pynpra ïa ka jaitbynriew. Ka jingai jait kmie ïa ki khun shipiah na ki khun kpa dkhar ka pynsniew dur ïa ka riti ka dustur uba barim bajah.
C. B. Iawphniaw
