Shillong, Jylliew 07
Ka Meghalaya Football Association (MFA) kan shong jingïalang mynta ka Sngi Saitjaiñ na ka bynta ban shim ïa ka rai ban sdang noh ïa ki ar tylli ki lympung ïalehkai, ka Meghalaya State League bad ka Meghalaya Youth League.
Kine ki ar tylli ki lympung ki dei kiba la ap khmih lynti da baroh ki synjuk ïalehkai kiba la pynïasoh sha ka MFA hadien ba ki la lah ban pyndep ïa baroh ki lympung ïalehkai jong u snem ba la dep.
Wat la kiwei ki la lah ban pyndep lut baroh ïa ki lympung ïalehkai, hynrei ka MFA ka dang ap sa tang ïa ka Shillong Sports Association, kaba la lah ban pyndep mynshem bnai ïa ka Shillong Premier League 2023. Te kumta ki kynhun ki ban mihkhmat na ka SSA sha katei ka lympung kin long ka Mawlai SC kaba la bat ar sien ïa ka nam lahduh ha ka SPL, kumjuh ka Rangdajied United FC kaba long ka lahduh jong ka MSL ba la dep, kumjuh ka Langsning FC bad ka Shillong Lajong FC.
Ïa kane ka lympung ïalehkai Meghalaya State League yn pynlong ha saw tylli ki zone kiba kynthup ïa ka East, West, Jaiñtia bad Garo zone, katba ïa ka final lah ban pynlong ha ka nongbah Shillong.
Haba kaba ïadei bad ka Meghalaya Youth League, ka MFA ka la shim ïa ka sien jam kaba nyngkong eh ban pynlong mynta u snem hadien ba la lah ban pyndep ïa ka jingjurip rta ïa ki khynnah ïalehkai U-13 bad U-15.
Kumba long ïa ka MSL, ïa ka MYL yn pynlong ha baroh saw tylli ki zone kata ha East, West, Jaiñtia bad Garo zone.
Wat la ym shym la lah ban pynlong da ka synjuk ka barim, hynrei hadien ka jingshimti da ki nongïalam bathymmai, kane ka synjuk ka la phaikhmat ruh sha ki lympung ïalehkai ki khynnah (Youth League) namar ka long ka shlem saiñdur ïa ka lawei jong ki khynnah bad ha kajuh ka por kan ïarap ban pynsuk ïa kane ka synjuk ba kan sei ïa ka kynhun kaba khlaiñ bor da kaba jied ïa ki khynnah ïalehkai kylleng ki district ki ban mihkhmat ïa ka Jylla sha ki lympung ïalehkai shabar jylla (national level).
Lah ban pynkynmaw na ka liang ka MFA ha kane ka kynti kaba mynta ka la rai ruh ban jied noh da ki rangïaleh-kai kiba kynsai na ka MSL ki ban mihkhmat ïa ka Jylla sha ka Santosh Trophy ka sa ban long shen mynta u snem.
