Shillong, Jylliew 07
U Roberto Martinez u la shaniah tylli ha u Cristiano Ronaldo naduh ba u la shimti kum u coach ka Portugal bad u don ka jingngeit kaba skhem ba un lah ban pynurlong ïa ka nam ha ka European Championship ha ka sien ba ar, katba ka Georgia ka la la lah ban pynurlong ha ka sien kaba nyngkong eh ban ïoh rung sha kane ka lympung bad ka don ha ka Group-F.
U Ronaldo u la ïoh ban ïalehkai na ka ri lajong haduh 206 sien bad u la la ïoh ban thep haduh 128 kol shwa ba u Martinez un shimti ïa kane ka kynhun.
Une u rangïalehkai ba 39 snem ka rta u la khmih lynti ban khur ïa ka rekod ha Germany ha kaba u la ïoh ban ïashim bynta haduh 11 sien ha kine ki lympung ïalehkai kiba heh, kynthup ïa hynriew sien ha ka European Championship, bad khmih lynti ruh ban bteng ïa ka rekod ha ka jinglah ban thep kol na ki 14 kol ha kane ka lympung.
Une u khlur ïalehkai u dei ba ar napdeng ki nongthep kol ha ka lympung ïaknieh jong ka Euro 2024 (qualifying), ha kaba la mih ka jingsngew khuslai ïa ka Portugal naduh ba u la leit ïalehkai sha ka Saudi Pro League.
Kumba ka paw u Ronaldo u la shah weng na ka thup ïalehkai ba khatwei (first eleven) hapoh ka jingïalam u Fernando Santos ha ka pre-quarter final jong ka FIFA World Cup 2022. Kane ka la pynlong ïa ka Portugal ban shah rem noh ha ka quarter-final ha ka Morocco.
Hyneri u la ïadon lang bad kane ka kynhun wat la ka Portugal ka la pynmih da kiwei pat ki rangïa-lehkai shakhmat kum u Bruno Fernandez, Ber-nardo Silva, Diogo Jota bad u Goncalo Ramos.
“U Cristiano u dei u rangïalehkai uba kynsai ha ka pyrthei bad uba la ïashim bynta ha kiba bun ki lympung ïalehkai bar ri,” la pynpaw u Martinez hadien ba u la shah thung kum u coach hadien ba la kut ka World Cup ha Qatar.
“Baroh ki rangïalehkai ki don ïa ka bynta kaba kongsan. Ki rangïalehkai kiba dang khynnah ki thrang ban ïoh ïalehkai bad ki rangïalehkai kum u Cristiano Ronaldo, Rui Patricio bad u Bernardo Silva ki long kiba tbit.”
Wat la ka rta jong u Ronaldo ka la nangïaid, hynrei um pat long uba rangbah hapoh ka kynhun.
“U paralok ba ïalehkai lang na ka Real Madrid u Pepe ba la 41 snem ka rta bad mynta u la ïalehkai na ka Porto, u la shah khot sha kane ka kynhun namar u long uba kongsan ban ïadon lang hapoh ka kynhun”, la bynrtap u Martinez.
U paralok jong u Ronaldo uba ïalehkai lang na ka Al-Nassr teammate Otavio un duh ïalehkai na ka daw ba u la mynsaw bad u rangïalehkai shapdeng ka Manchester City u Matheus Nunes u la shah khot na ka bynta ban mih bujli.
Ka Portugal kaba la don ha ka Group-F, kan pynkhreh ïa ka jingïakhun kaba nyngkong pyrshah ïa ka Czech Republic ha Leipzig ha ka 18 tarik mynta u bnai, hashwa ba kan ïakynduh ïa ka Turkey ha Dortmund bad ïa ka Georgia ha Gelsenkirchen ha ka 26 tarik.
