Hashwa ban sdang ka Dorbar banyngkon jong ka Lok Sabha kaba 18 hadien ba la kut ka ilekshon, kawei na ki jingdkoh ha ka rukom pynïaid Dorbar ha Parliament ka dei ka jingaipor duna palat ïa ki MP kiba mihkhmat ïa ki seng saiñpyrthei kiba rit lane ki MP khlem seng. Ki MP kiba dei na ki seng saiñpyrthei kiba kham heh pat, ki ïohlad ban kren kham jrong. Katkum ka jingpynïaid Dorbar Parliament, ka por ba la ai sha kano-kano ka seng saiñpyrthei ban kren ka shong katkum ka jingbun paid. Namarkata, kito ki MP kiba wan na ki seng rit lane ki MP khlem seng ki kham ïoh duna ka por. Ka ju long ka rukom ba la aipor shwa ïa ki MP na ki seng kiba heh ban kren ha ki jingïatai, bad lada dang don ka por, la ailad sa ïa ki MP na ki seng kiba rit. Katkum ka jingpynïaid, ki MP na ki seng ki barit ki ïoh por tang kumba lai minit eiei ban kren, hynrei ka shong ruh pat ha u Lamphang uba don ka iktiar ban pynjlan ïa ka por kren.
Ki paidbah ki ju ïa khñium sharum shaneng haba ki ïohi ba ki MP jong ki, kim ju kham ïashim bynta ha ki jingïatai ha ka Dorbar Parliament la ka dei ka Lok Sabha ne Rajya Sabha. Sa kawei ruh ka rukom ka long ba lada ym pat dei hi ki kynrem ki lyndan kiba shyrkhei ban ïatai, u Lamphang um ju kham ailad than ïano-ïano ban kren palat. Ngi ïohi ba lada kren kum u Myntri Rangbahduh lane u Nongïalam ka Liang Pyrshah, u Lamphang u ju ai bun por bad um ju kham tuklar. Kine ki ïoh bha ïa ka lad ban pynpaw sani ïa ki nia bad ki nongrim. Teng-teng lada don makna ki MP kiba tbit ban ïatai, hynrei ki dei na ki seng kiba rit lane ki MP khlem seng, kim ju kham ïoh ïa ka lad ban kren jrong. Namarkata, ki don tang khyndiat eh ki nongshong shnong kiba da ithuh dur khmat ïa kiba bun na ki MP jong ka Ri la ki dei na ka Lok Sabha ne Rajya Sabha.
Naduh ba ka Parliament ka la ailad ban pyni paidbah ïa ka Dorbar, ki nongshong shnong ki la ïoh ïa ka kabu ban peit kumno ki MP jong ngi ki ïashim bynta. Hynrei bunsien pat ngi ïohi sa tang ka jingïapyrta shla, jingrah jingthoh, jingbym ailad ïa ka Dorbar ba kan ïaid beit bad kumta ter-ter kaba pynbor ïa u Lamphang ban pynwai jubor. Da ki phew klur tyngka ha ka shi sngi ka shu kylla long lehnohei namar ka jingbymlah jong ki MP ban ïakren da ka jingïasngewthuh jingmut lane ka jingburom markylliang. Kane ka pynlong ïa ki katto katne ki nongshong shnong ban ym sngewtynnad shuh ïa ka saiñ hima sima lane ban ïashim bynta ha ka jingjied ïa ki MP. Ka daw kam dei namar jong ki paidbah, hynrei na ki MP kiba pyni ïa ki nuksa kiba bakla. Ha ka jingshisha, ka Dorbar Parliament ka dei kaba biang tam ban ïathir, ïatai bad ban shim ïa ki rai bakongsan khnang ban pynïaid shakhmat ïa ka Ri bad ïa ka synshar ka khadar. Baroh ki khmih lynti ba ki MP kin long kiba don akor don burom, hynrei ki paidbah ki shah shet kylla pynban namar ka jingbymlah ban pynïaid beit ïa ka Dorbar. Kane kan ym kylla da lei-lei ha India bad kan ïai long beit kumne lada wan synshar sa mano-mano ruh.
Lehse ka la dei ka por ïa ka Parliament ba kan pynkylla noh ïa ki aiñ bad kyndon kiba teh ba khum ïa ki MP khnang ba kan kham don ka jingbeit ha ka jingpynïaid ïa ka Dorbar. Kino-kino ki MP kiba leh tam pud bad kiba smat ban pynthud ïa ka Dorbar, ki dei ban shah mait kyrteng syndon bad ym tang ban shah sospon shipor hadien ba la ailad ïa ki ban pynbeit ïalade. Tangba ha kajuh ka por, ka Parliament ka dei ban ailad ïa ki MP ba kin pynpaw ïa la ki jong ki jingsngew bad ym ban pynlyngkot jubor ïa ka por kren jong ki. Lada ka long ha kane ka rukom, kan kham pynduna ïa ka jinghuri hura hapoh Dorbar, bad ngin ïohi shisha ba ki MP jong ngi ki ïa pynlut por ban ïatai halor ki mat ki jura kiba ktah ïa ka Ri. Ha ka jingshisha, ka Parliament ka dei ban ailad bha ïa ki MP kiba wan na ki kyndong kynshrot bad ki jaka ba dang sahdien ba kin kren bha ha ka Dorbar khnang ba ka Sorkar Pdeng kan tip kham bha ïa ki jingeh bad jingduna. Ban shu ïa khim jingmut than ruh kam long namar ki dang bun bah ki jaka kiba dang hap ban ïoh jingïarap kaba kham heh na ka Sorkar Pdeng.
Ngi kyrmen ba kiba bun ki MP na ki seng saiñpyrthei, khamtam kito kiba hap shong ha ka liang pyrshah, kin pynbor ïa u Lamphang ka Lok Sabha bad Shongknor ka Rajya Sabha ban pynkylla noh ïa ki kyndon ha kaba ïadei bad katei ka jingai por bun ne khyndiat ïa ki MP ban kren. Haba ki la shah jied da ki paidbah ban kren ha Parliament, ym lah ban khate noh ïa ka por tang na ka daw ba ki wan na ki seng ne ki jylla barit. Baroh ki MP ki dei ban ïoh ïa ka por kaba kham jlan khnang ba kin lah kham bha ban pyni ïa ki nongrim ki jong ki ha ryngkat ki jingeh jong ki paidbah bad ki konstitwensi kiba ki mihkhmat.
