Shillong, Jylliew 09
Ka Meghalaya Football Association (MFA) ka la rai ban sdang noh ïa ka lympung ïalehkai Inter District Meghalaya Youth League naduh ka 20 tarik u Naitung mynta u snem, katba ïa ka Meghalaya State League ka dang ap ban jingïarap shwa na ka Sorkar Jylla.
Kane ka la wan hadien ba ka executive committee ka la shong jingïalang ha ka sngi Saitjaiñ ha conference hall jong ka Shillong Sports Association kaba ha SSA Stadium, Polo.
Haba pynpaw ha ki lad pathai khubor, u Secretary bad u Vice President ka MFA u Bah Sunesh Syiem lem bad u Bah Cliff R. Nongrum ki la pyntip ruh ba ha kane ka jingïalang ka executive committee kaba la long mynta ka sngi la shim ruh ïa ka rai na ka bynta ka jingpynkhreh ban pynlong ïa ka Meghalaya State League bad kumjuh ïa ka Women’s League.
Haba ïadei bad ka MSL, u Bah Sunesh u la ong ba la buh ha ka jingmut ba lada lah ban ïoh lei-lei sa ka mang pisa na ka Sorkar Jylla, ïa kane ka lympung ruh lah ban pynlong ha u Naitung, kaba mut tang na ka bynta ki qualifiers ki ban pyndap ïa ki jaka kiba lait bad ïa ka lympung kaba pura pat yn sa lah ban pynlong ha u Nailar.
Haba phai sha ka Women’s League, ka MFA kan pynlong kumba la leh ïa ka Youth League ha kaba ki kynhun ban ïashim bynta kin dei lyngba ki district association kaba lah ban shim por bad pynlong shaduh u Risaw lane Naiwieng mynta u snem.
