London, Jylliew:
Ki pulit ka London ki la pyntip ba ki la ioh tam ia iwei khyllung ba dang shu kha hapoh une u snem bad la ong ba itei khyllung i don sa 2 ngut ki hynmen kiba la shempap ha kane kajuh ka rukom ha u Kyllalyngkot 2024.
Ia i ne khyllung la buh kyrteng hi noh da ki nos kum Baby Elsa hadien ba ki la shem na kawei ka song jaiñ kaba la kyllaiñ bha napoh ka pla rah-kti bad la lap ruh da uwei u briew uba dang ialam iaid kai ia u ksew lade ha London bad uba la pyntip pat mar-mar sha ki bor pyniaid.
Haba la peit bniah ia itei khyllung bad ynda la leh ia ka ‘DNA Test’ la shem i don ia ki hynmen kiba la tip kum u Baby Harry bad Baby Roman, ia kiba la lap ha katei hi ka rukom ha ki snem 2017 bad 2019 na katei ka nongbah jong ka Britain.
Kumta, ki pulit ki dang wad bniah ban lap ia ki kmie-kpa jong kitei ki khyllung naba ki ju kha bad bret ia ki khun na uwei u snem sha uwei. Na ka liang ki bor pyniaid kim lah shuh ban sngewthuh ia ka jingthmu jong katei ka longiing kaba ju kha khun man ki snem bad bret ruh man ba dep kha.
