Shillong, Jylliew 09
U coach ka England u Gareth Southgate u la rai ban ym kynthup ïa u rangïalehkai shadien u Harry Maguire lem bad u rangïalehkai shapdeng u Jack Grealish hapoh ka kynhun jong 26 ngut ki rangïalehkai na ka bynta ka European Championship.
Kane ka rai ka long shi bynta ban pynkhreh ïa ka kynhun na ka bynta katei ka lympung ka ban long ha Germany.
U Maguire, uba la ïoh ban ïalehkai haduh 63 tylli ki jingïalehkai bar ri bad u la long u rangïalehkai ba kynsai na ka bynta ka Manchester United, u la shah kyntait napoh katei ka thup na ka daw ki kyndon jong ka jingjied lem bad u rangïalehkai ka Manchester City u Grealish, uba la ïoh ban ïalehkai 36 sien na ka bynta ka England.
Wat la ki la lah ban noh synñiang na bynta kitei ki klob ba ki mihkhmat hynrei ka jingbym shah kynthup ka dei na ka daw ki kyndon jong ka jingjied bad ki la duh ïa ka lad ban mihkhmat ïa ka ri ha kane ka kynti kaba mynta.
Ïa kane ka kynhun la pynbna da u Southgate kaba kynthup ïa ki rangïalehkai shakhmat kum u Jude Bellingham, uba la ïadon bynta dangshen bad ka Real Madrid kaba la khur ïa ka nam lahduh ha ka Champions League, bad u Harry Kane jong ka Bayern Munich. U Phil Foden, uba la lah ban ïalehlai bha na ka bynta ka Manchester City bad u Bukayo Saka na ka Arsenal, ki la long ki rangïalehkai kiba kynsai ki ban ïarap ban pynkhlaiñ ïa ka England. Kane ka jingjied ka la kynthup lang ïa ki rangïalehkai kiba dangkhynnah lem bad kiba la ju mlien ha kane ka kam ïalehkai khnang ban pynkhlaiñ ïa kane ka kynhun.
Wat la u Maguire um shym la shah kynthup, hynrei u para nongïalehkai ka Manchester United u Luke Shaw u la shah kynthup hapoh kane ka kynhun, watla u dangdon hapdeng ka jingmynsaw bad um shym la ïashim bynta lang bad ka kynhun ha ka jingkilanmet na ka bynta ka jingïalehkai paralok pyrshah ïa ka Iceland ha Wembley. Kane ka dei ka jingïohi jngai u Southgate ban wanrah ïa ka kynhun kaba biang ha ka jingdon ïa ki rangïalehkai bad kiba la lah ban ïalehkai na ka bynta ka ri.
Hapoh kane ka kynhun ki la paw ruh 12 ngut ki rangïalehkai kiba dangdonkam ban pynpaw ïa ka jingtbit ha ki lympung ïalehkai kiba heh, kynthup ïa u Lewis Dunk, Joe Gomez, Marc Guehi, Ezri Konsa bad kiwei. Kane ka jingkynthup ïa kitei ki rangïalehkai ka long ban sei ïa ki rangïalehkai ki ban lah ban ïalehkai na ka bynta ka England ha ki lympung ïalehkai ki ban wan.
Kiwei patk ki rangïalehkai ki bym shym la paw hapoh kane ka kynhun ki long u James Maddison, Jarrad Branthwaite, James Trafford, Curtis Jones bad u Jarrell Quansah.
Kumta ka England kan pynkhreh ïa ka jingïalehkai kaba nyngkong ha ka Euro 2024 pyrshah ïa ka Serbia ha ka 16 tarik mynta u bnai, bad ka jingjied ïa ki rangïa-lehkai ka kynthup ïa kiba biang ha ka rukom ïalehkai bad kiba dang-sdang ban kiew shaphrang namar ka jingkhmih lynti ka long ban ïalehkai bha ha kane ka lympung.
